މިހާރުގެ މާލީ ހާލަތު ސިޔާސީ އިސްވެރިން ރައްޔިތުންނަށް ކިޔައިދޭންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބީއެމްއެލްއަށް ޑޮލަރު ލިބުން ދަތިވެ އެކަމާއި ގުޅިގެން ނިންމި ނިންމުންތަކާއި ގުޅުވައި އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވެފައިވަނީ މިހާރުގެ މިހާލަތައި ގުޅުވައި ހުރިހާ ސިޔާސީ ލީޑަރުންވެސްގެ ޒިންމާ ވަރަށް ބޮޑުކަމަށެވެ.

މާލީ ހާލަތު މިހިސާބަށް ދިޔަގޮތާއި، ދެންވެދާނެކަމަށް ލަފާ ކުރެވޭ ގޮތާއި އަދި އަމަލުކުރަން ރާވާފައި އޮތް ގޮތްތައް ސާފުބަހުން ރައްޔިތުންނަށް ކިޔައިދޭން ޖެހޭނެކަމަށް ވެސް ނަޝީދު ވަނީ މި ޕޯސްޓުގައި ޝާއިއުކޮށްފައެވެ.

ބީއެމްއެލް ވަނީ މިހާރު މިހާރު ދޫކޮށްފައިވާ ޑެބިޓް ކާޑުތަކުގެ ޕްރައިމަރީ އެކައުންޓްތަކުގެ ގޮތުގައި ރުފިޔާ އެކައުންޓްތައް ބޭނުންކުރާ އެކައުންޓްތަކަށް ޑޮލަރު ދޫކުރެެވެން ނެތްކަމަށް ހާމަކޮށްފައެވެ. އަދި މިއަދުން ފެށިގެން ދޫކުރާ ކާޑުތަކުން ވެސް ޕްރައިމަރީ އެކައުންޓްތަކުގެ ގޮތުގައި ރުފިޔާ އެކައުންޓެއް ހުރެއްޖެނަމަ މިގަވާއިދު ތަންފީޒުކުރެވިގެންދާނެ ކަމަށް ވެސް ބީއެމްއެލް އިން ވަނީ ކަނޑައަޅާފައެވެ. އަދި މިހާރު ދޫކޮށްފައިވާ ސްޓެންޑާޑް އަދި ގޯލްޑް ކްރެޑިޓް ކާޑުތަކަށް ވެސް މަހެއްގެ މައްޗަށް ލިބޭނީ 100 ޑޮލަރު ކަމަށް ބޭންކުން ވަނީ ނިންމައިފައެވެ

ބީއެމްއެލް އިން މިފަދަ ބަދަލުތަކެއް ގެންނަން ޖެހުނީ އެ ބޭންކަށް ވަންނަ ޑޮލަރަށް ވުރެ އެކައުންޓްތަކުން ކުރާ ޑޮލަރުގެ މުއާމަލާތް އިތުުރުވެ ޑޮލަރު ލިބުން ދަތިވެގެން ކަމަށް އެބޭންކުން ވަނީ ހާމަކޮށްފައެވެ، މީގެ ސަބަބުން ގިނަ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.