މިލިއަން ޑޮލަރުގެ ލޯނެއް ބޭންކް އޮފް މޯލްޑިވްސް (ބީއެމްއެލް) އަށް ނުދެއްކިގެން، ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ މަސްލަހަތު އޮންނަ ހެވީލޯޑް ކުންފުނީގެ ތިން ރަށެއް ވިއްކާލަން ސިވިލް ކޯޓުން ބީއެމްއެލްއަށް ދީފައިވާ ހުއްދަ، ހައި ކޯޓުން ބާތިލްކޮށްފިއެވެ.

މި ރަށްތައް ވިއްކާލުމަށް ސިވިލް ކޯޓުން ހުއްދަ ދިނުމުގައި މަދަނީ އިޖުރާއަތުގެ ގަވާއިދާ ހިލާފުވެފައިވާ ކަމަށް ހައި ކޯޓުން ވަނީ ނިންމާފައެވެ.

Ad by Hajj Corporation

ހެވީލޯޑް ކުންފުނިން ބީއެމްއެލްއަށް ދައްކަންޖެހޭ 11 މިލިއަން ޑޮލަރު (170 މިލިއަން ރުފިޔާ) ގެ ލޯނެއް ނުދެއްކުމުގެ ސަބަބުން، ބީއެމްއެލްއިން އެ ރަށްތައް ވިއްކާލުމަށް ސިވިލް ކޯޓުގައި އެދުނެވެ. އެ ބޭންކުގެ އެދުމަށް، މި ރަށްރަށް ވިއްކާލުމުގެ ހުއްދަ ސިވިލް ކޯޓުން ދިނުމުން، ބީއެމްއެލްއިން މިދިޔަ އަހަރު ނޮވެމްބަރު މަހު މި ރަށްރަށް ވިއްކާލަން އިއުލާންކުރިއެވެ.

ނަމަވެސް، ހެވީލޯޑުން އެ މައްސަލަ ހައި ކޯޓުގައި އިސްތިއުނާފުކުރުމުން، ރަށްތައް ވިއްކާލުން މަޑުޖައްސާލަން ހައި ކޯޓުން ވަގުތީ އަމުރެއް ވެސް ނެރެފައިވެއެވެ.

ހައި ކޯޓުން ހުކުމްކުރި ގޮތުގައި، ރަހުނުގެ ގޮތުގައި ހިފަހައްޓާފައިވާ ރަށްތައް ވިއްކާލުމުގެ ހުއްދަ ދިނުމުގައި ސިވިލް ކޯޓުން އެ ކޯޓުގެ މަދަނީ އިޖުރާއަތުގެ ގަވާއިދާ ހިލާފުވެފައިވެއެވެ. އެއީ، ރަހުނުގެ އަގު ކަނޑައަޅާފައިވަނީ ހަމައެކަނި ބީއެމްއެލްއިން ހުށަހެޅި އަގަށް ބަލައިގެން ކަމަށްވާތީއެވެ. ހަސްމުންގެ އެއްވެސް އިހުމާލެއް ނެތި، ޝަރުއީ އަގު ކޮމިޓީން މުދާ އަގުކުރުމުގައި ލަސްތަކެއްވާ ނަމަ، ކޯޓުން ކުރަންޖެހޭ ކަމަކީ އެ މަސައްކަތް އަވަސް ކުރުވުން ކަމަށް ހައި ކޯޓުން ފާހަގަކުރިއެވެ. ހަސްމުންގެ އިހުމާލެއް ނެތް ހާލަތުގައި މަދަނީ އިޖުރާއަތު ފުރިހަމަ ކުރުމެއް ނެތި ރަހުނު ވިއްކާލުމުގެ ހުއްދަ ދިނުމަކީ ރަނގަޅު ގޮތެއް ނޫން ކަމަށް ހައި ކޯޓުގެ ހުކުމުގައި ބުނެފައިވެއެވެ.

ބީއެމްއެލްއިން ވިއްކާލަން އިއުލާންކުރި ރަށްތަކަކީ ލ. ފަރެސް އައިލެންޑް، ކުޑަ ފަރެސް އައިލެންޑް، އަދި ބޮޑުހުރާ އައިލެންޑެވެ. އޭގެތެރެއިން ފަރެސް އާއި ކުޑަފަރެހަކީ މިހާރު ރަހާ ރިސޯޓް ހިންގަމުންދާ ދެ ރަށެވެ. ބޮޑުހުރާއަކީ ދަނޑުވެރިކަމަށް ދޫކޮށްފައި އޮންނަ ރަށެކެވެ. މި ރަށްރަށުގެ ހެޑް ލީޒް ހަމަވަނީ 2064 ވަނަ އަހަރުއެވެ.