ރައްޔިތުންގެ މަޖިލީހުގެ މާފުށި ދާއިރާގެ މެމްބަރު އަލްއުސްތާޛު ޙުސައިން ރިޒާ އަދާމް  ޖުޑީޝަލް ސާވިސް ކޮމިޝަން، ޖޭއެސްސީގެ މެމްބަރުކަމުން އިސްތިއުފާދެއްވައިފިއެވެ.

ޖޭއެސްސީގައި ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ހުންނަވާ މެމްބަރުގެ ގޮތުގައި ހުންނެވި ރިޒާ އެ ކޮމިޝަނުން އިސްތިއުފާދެއްވާފައިވާއިރު، ރިޒާ އިސްތިއުފާދެއްވި ސަބަބެއް އަދި ސާފެއް ނުވެއެވެ. ނަމަވެސް ރިޒާ އެ ނިންމެވުން ނިންމަވާފައިވާކަން ވަނީ ކަށަވަރުވެފައެވެ.

Ad by Hajj Corporation

ރިޒާ ޖޭއެސްސީން އިސްތިއުފާދެއްވުމާ އެކު ޖޭއެސްސީގެ ރައީސްކަން ވެސް ހުސްވާނެއެވެ.

ޖޭއެސްސީގެ ރައީސްކަމަށް ރިޒާ އިންތިޚާބުކުރީ 12 ޖޫން 2024 ގައެވެ.

ގާނޫނު އަސާސީގައި ޖޭއެސްސީ އެކުލެވިފައި އޮންނަ ގޮތުން މަޖިލީހުގެ ރައީސާއި މަޖިލީހުން ކަނޑައަޅާ މެމްބަރަކު ޖޭއެސްސީގެ މެމްބަރުންގެ ގޮތުގައި ތިއްބަވާނެ އެވެ. އެގޮތުން، މަޖިލީހުން ޖޭއެސްސީއަށް ކަނޑައަޅާ މެމްބަރު ކަމަށް މެމްބަރު ރިޒާ އައްޔަންކުރަން މަޖިލީހުން ފާސްކުރީ 3 ޖޫން 2024 ގައެވެ. ޖެހިގެން އައި 4 ޖޫން 2024 ގައި އޭނާ ވަނީ އެ ކޮމިޝަނަށް ރަސްމީކޮށް ޢައްޔަނުކޮށްފައެވެ.

މަޖިލީހުގެ ރައީސާއި މަޖިލީހުގެ މެމްބަރެއްގެ އިތުރުން ޖޭއެސްސީގައި ދެން ތިއްބަވާނީ ރައީސްގެ މެމްބަރަކާއި ބަންޑާރަ ނައިބާއި ސުޕްރީމް ކޯޓުގެ ފަނޑިޔާރަކާއި ހައި ކޯޓުގެ ފަނޑިޔާރެއްގެ އިތުރުން ދަށު ކޯޓުގެ ފަނޑިޔާރަކާއި ވަކީލުންގެ ތެރެއިން އިންތިހާބުކުރާ ވަކީލަކާއި އާންމުންގެ ތެރެއިން މެމްބަރެކެވެ.