ނެދަލޭންޑްސް އިން އިސްރާއީލަށް ހަތިޔާރު ވިއްކުން ހުއްޓާލުމަށް އެޤައުމުގެ އެޕީލްސް ކޯޓަށް ހުށަހަޅާފައިވާ ބިޑު، ދަށު ކޯޓުގެ ނިންމުމަށް ތާޢީދުކޮށް، ބޭރުކޮށްލައިފިއެވެ.

އިސްރާއީލުން، ފަލަސްޠީނުގައި ހިންގަމުންދާ ލާއިންސާނީ ޖަރީމާތައް ކުށްވެރިކޮށް އަޑުއުފުލަމުންދާ ނެދަލޭންޑްސްގެ ގްރޫޕްތަކަކުން ކޯޓަށް ހުށަހަޅާފައިވާ މި މައްސަލަ ބޭރުކޮށްލާފައިވަނީ އެޤައުމުން ބޭރުކުރަމުންދާ ހަތިޔާރުތަކުގެ ބޭނުންކޮށްގެން ބައެއްގެ ހައްގުތައް ނަގާލާކަމުގެ ހެކި، ދަޢުވާގައި ދެއްކިފައި ނުވާކަމަށް ބުނެއެވެ.

Ad by Hajj Corporation

ކޯޓުގެ ޙުކުމުގައި އިތުރަށް ބުނެފައިވަނީ، ފޭރިގެންފައިވާ ބިންތަކުގައި މަސައްކަތް ނުކުރުމަށް އެޤައުމުގެ ކުންފުނިތަކަށް ސަރުކާރުން ވާވަރަށް ބާރުއަޅާފައިވާ ކަމަށެވެ.

މައްސަލަ ހުށަހެޅި ފަރާތުން ދަޢުވާގައި ބުނެފައިވަނީ، ނެދަލޭންޑްސް އަކީ 1948 ގެ ޖެނީވާ މުޢާހަދާގައި ސޮއިކޮށްފައިވާ ދައުލަތެއްފެ ހައިސިއްޔަތުން، އިސްރާއީލުން ޚާއްޞަކޮށް ޣައްޒާގައި، ހިންގަމުންދާ ނަސްލު ނައްތާލުމުގެ ޖަރީމާތައް ހުއްޓުވަން ކުރެވެން ހުރި ހުރިހާ މަސައްކަތެއް ނެދަލޭންޑްސް އިން ކުރަންޖެހޭނެ ކަމަށެވެ.

ނެދަލޭންޑްސްގެ ކޯޓަށް މިފަދައިން މައްސަލަ ހުށަހަޅާފައި ވާއިރު، އިސްރާއީލުން އަންނަނީ ތަކުރާރުކޮށް، ފަލަސްޠީނުގައި ނަސްލު ނައްތާލުމުގެ ޖަރީމާއެއް ހިންގަމުން އަންނަކަމަށް އިންކާރުކުރަމުންނެވެ. އިސްރާއީލުން ބުނާގޮތުގައި އެމީހުންގެ ހަމަލާތައް އަމާޒުކުރަނީ "ހަމާސްއަށް އެކަނި" އެވެ.

ނެދަލޭންޑްސްގެ އެޕީލްސް ކޯޓުން ވަނީ ނަސްލު ނައްތާލުމުގެ ހަނގުރާމައެއް ހިނގާނަމަ، ޖެނޮސައިޑް ކޮންވެންޝަންގެ ދަށުން އެކަން ހުއްޓުވުން އެޤައުމަށް ލާޒިމުކުރާކަމަށް އެއްބަސްވެފައެވެ. އަދި ޣައްޒާގައި އިސްރާއީލުން ހިންގްމުންދާ ޢުދުވާނަކީ "ނަސްލު ނައްތާލުމުގެ ހަނގުރާމައަކަށް ވެދާނެކަމުގެ ބިރު އެބައޮތް" ކަމަށްވެސް ކޯޓުގެ ޙުކުމުގަިއ ބުނެފައިވެއެވެ. ނަމަވެސް، އެޕީލްސް ކޯޓުން ވަނީ ދަށު ކޯޓުގެ ޙުކުމަށް ތާޢީދުކޮށް، އެ ޙުކުމް ދަމަހައްޓާފައެވެ.

މައްސަލަ ހުށަހެޅިި ޖަމާޢަތްތަކުން ބުނެފައިވަނީ، އެފް-16 ޖެޓަށާއި ހަނގުރާމަމަތީ އުޅަނދުތަކަށް ބޭނުންވާނެ ބައިތަކުގެ އިތުރުން ރޭޑަރ ސިސްޓަމްތަކާއި ޕޮލިސް ޑޯގްތަކަކާއި، ކެމެރާތަކަކާއި ސަވޭލަންސް ސިސްޓަމްތަކަށް ބޭނުންވާނެ ސޮފްޓްވެއަރ، ނެދަލޭންޑްސްއިން އިސްރާއީލަށް ފޯރުކޮށްދީފައިވާ ކަމަށެވެ.