އިޓަލީގެ އުދީނޭ ސިޓީގައި އިސްރާއީލާ ދެކޮޅަށް ބޭއްވުމަށް ހަމަޖެހިފައިވާ މެޗާ ގުޅިގެން ފަލަސްޠީނަށް ތާއީދުކޮށް ބޮޑު މުޒާހަރާއެއް ކުރުމަށް ރޭވިފައިވާތީ، އިސްރާއީލު ޓީމު ތިބި ހޮޓަލުގެ ފުރާޅުގައި ސްނައިޕަރުން އަތުރައިފިއެވެ.

ގައްޒާގައި ހަނގުރާމަ ވަގުތީގޮތުން ހުއްޓާލާފައިވީ ނަމަވެސް، މުޒާހަރާގެ ރިސްކް އޮތުމާ ގުޅިގެން އުދީނޭ ސިޓީގައި ސަލާމަތީ ފިޔަވަޅުތައް ވަނީ ވަރަށް ބޮޑަށް ހަރުދަނާ ކޮށްފައެވެ. މިގޮތުން ސިޓީގެ ފިހާރަތަކާއި ރެސްޓޯރަންޓްތައް އާދަޔާ ޚިލާފަށް އަވަހަށް ބަންދުކުރުމަށް އަންގާފައިވެއެވެ.

Ad by Hajj Corporation

މިމެޗާ ދެކޮޅަށް އިޓަލީގެ ގިނަބަޔަކު ނުރުހުން ފާޅުކޮށް، އެތައް ބަޔަކު އިޓަލީގެ މަގުމައްޗަށް ނިކުންނަން ތާއްޔާރުވެފައިވާ މިމެޗު ކުޅޭ ބްލޫއެނަރޖީ ސްޓޭޑިއަމަށް އިސްރާއީލު ޓީމު ގެންދިއުމަށް ހަމަޖެހިފައިވަނީ މިލިޓަރީ އެސްކޯޓާ އެކުގައެވެ. އަދި ސްޓޭޑިއަމްގެ ފުރާޅުގައިވެސް ސްނައިޕަރުން ބެހެއްޓުމަށް ވަނީ ނިންމާފައެވެ. މީގެ އިތުރުން ސްޓޭޑިއަމް ސަރަހައްދުގައި ގިނަ އަދަދެއްގެ ފުލުހުންނާއި މިލިޓަރީ މުވައްޒަފުން އެއްވެސް ހަމަނުޖެހުމެއް ހިނގިޔަ ނުދިނުމަށް ތިބޭނެއެވެ.

އިޓަލީގެ ފުޓްބޯޅަ އެސޯސިއޭޝަން (އެފްއައިޖީސީ) އިން ބުނާ ގޮތުގައި 25،000 މީހުންގެ ޖާގައިގެ ސްޓޭޑިއަމަށް މިހާތަނަށް ވިއްކިފައިވަނީ 8،000 ޓިކެޓެވެ. ނަމަވެސް ސްޓޭޑިއަމް ބޭރުގައި 10،000 އަށްވުރެ ގިނަ މުޒާހަރާކުރާ ފަރާތްތައް އެއްވުމަށް ލަފާކުރެވެއެވެ.

އިސްރާއީލާއި އިޓަލީ ދެމެދު ކުޅޭ މި މެޗު ކުރިއަށްދާނީ ރޭވިފައިވާ ގޮތަށްކަމަށް އޮފިޝަލުން ބުނެފައިވެއެވެ. ނަމަވެސް މިއީ މިފަދަ މެޗެއްގައި މިހާތަނަށް ބޭނުންކުރި އެންމެ ވަރުގަދަ ސަލާމަތީ ފިޔަވަޅުތަކާ އެކު ކުޅޭ އެއް މެޗެވެ.