ބާސެލޯނާގެ ފުޓްބޯޅަ ޓީމު ކޭމްޕް ނޯއަށް އެނބުރި އައިސް ދެ އަހަރަށް ވުރެ ގިނަ ދުވަހަށް ފަހު ކުޅުނު ފުރަތަމަ މެޗުން އެތްލެޓިކް ބިލްބާއޯ އަތުން 4-0 ގެ ބޮޑު މޮޅެއް ހޯދައި، ވަގުތީ ގޮތުން ލަލީގާގެ އެއްވަނައަށް އަރައިފިއެވެ. މި މެޗުގައި ބިލްބާއޯގެ އެއް ކުޅުންތެރިއަކަށް ރަތް ކާޑު ދައްކާފައިވެއެވެ.

މި މެޗުގައި ބާސެލޯނާގެ ފަރާތުން މާކަސް ރޭޝްފޯޑް ބަލިވެގެން ނުކުޅެވުނު ނަމަވެސް، އޭނާގެ ބަދަލުގައި ކުޅުނު ފެރާން ޓޮރޭސް ވަނީ ދެ ގޯލު ޖަހާފައެވެ. މި ދެ ގޯލު ޖެހުމުގައި ލަމީން ޔަމާލް ވަނީ ވަރަށް މޮޅު ދެ އެސިސްޓް ހަދައިދީފައެވެ. މެޗުގެ ފެށުން ރަނގަޅުކޮށް، ހަތަރު މިނެޓްގެ ތެރޭގައިކެޕްޓަން ރޮބަޓް ލެވަންޑޯސްކީ ވަނީ ބާސެލޯނާއަށް ލީޑު ނަގައިދީފައެވެ. އޭގެ ފަހުން ފުރަތަމަ ހާފުގެ އިތުރު ވަގުތުގެ ތިން ވަނަ މިނެޓްގައި ޔަމާލް ދިން ހިތްގައިމު ޕާހަކުން ޓޮރޭސް ވަނީ ގޯލު ޖަހާފައެވެ.

Ad by Hajj Corporation

ދެވަނަ ހާފު ފެށިތާ ތިން މިނެޓްގެ ތެރޭގައި ފާރމިން ލޯޕޭޒް ވަނީ ބާސެލޯނާއަށް ތިންވަނަ ގޯލު ޖަހައިދީފައެވެ. މި ގޯލު އޭނާ ޖެހީ ޕެނަލްޓީ އޭރިއާ ތެރެއިން އޭނާއަށް ލިބުނު ބޯޅައެއް ބޮޓަމް-ރައިޓް ކޯނަރަށް ފޮނުވާލައިގެންނެވެ. ބިލްބާއޯގެ ހާލަތު އިތުރަށް ގޯސްވީ 54 ވަނަ މިނެޓްގައި އޮއިހާން ސަންސެޓްއަށް ރަތް ކާޑު ދެއްކުމުންނެވެ. މެދުތެރެއިން ލޯޕޭޒްއަށް ކުރި ފައުލެއްގެ ސަބަބުން އޭނާއަށް ވަނީ ސީދާ ރަތް ކާޑު ދައްކާފައެވެ.

މެޗުގެ ފަހު ވަގުތު، ޔަމާލް ދިން ޕާހަކުން ޓޮރޭސް ވަނީ އޭނާގެ ދެވަނަ އަދި ބާސެލޯނާގެ ހަތަރުވަނަ ގޯލު ޖަހައިފައެވެ. ބާސެލޯނާގެ ސަޕޯޓަރުން އެ ޓީމު ކޭމްޕް ނޯގައި ކުޅޭ މެޗެއް ދެކެފައި ވަނީ 2023 ވަނަ އަހަރުގެ މެއި މަހުގެ 28 ވަނަ ދުވަހު މައްޔޯކާ އަތުން 3-0 އިން މޮޅުވި މެޗަށް ފަހުގައެވެ. މި ދިގު އިންތިޒާރަށް މިރޭގެ މޮޅުން ވަނީ ބަދަލު ލިބިފައެވެ.

މެޗަށްފަހު ދަނޑުގައި ވަނީ ލައިޓް ޝޯ އަކާއެކު ހަވާ އަރުވާފައެވެ.