ތޫފާން 'ދީތުވާ'ގެ ސަބަބުން ސްރީލަންކާގައި 200 އަށްވުރެ ގިނަ މީހުން ގެއްލިފައިވާކަމަށާއި 150 އަށްވުރެ ގިނަ މީހުން މަރުވެފައިވާކަމަށް ސްރީލަންކާގެ ޑިޒާސްޓަރ މެނޭޖްމަންޓް ސެންޓަރު (ޑީއެމްސީ) އިން ބުނެފިއެވެ.

ޑީއެމްސީން މިއަދު ހެނދުނު އާންމުކުރި ސިޓުއޭޝަން ރިޕޯޓުގައިވާ ގޮތުން، އިއްޔެ އިރުއޮއްސި 06:00 އާ ހަމައަށް، މި ތޫފާނުގެ ސަބަބުން ފެންބޮޑުވެ ހިނގައިދިޔަ ހާދިސާތަކުގައި 159 މީހަކު މަރުވެފައިވެއެވެ. އަދި 203 މީހަކު ގެއްލިގެން ރިޕޯޓުކުރެވިފައިވާކަމަށް ވެސް ޑީއެމްސީން އާންމުކޮށްފައިވާ މައުލޫމާތުން އެނގެއެވެ.

Ad by Hajj Corporation

ޑީއެމްސީން އާންމުކޮށްފައިވާ ބަޔާނެއްގައި ބުނެފައި ވަނީ، މި ތޫފާނުގެ އަސަރު، 234,503 އާއިލާއަކުން 833,985 މީހަކަށް ކޮށްފައިވާ ކަމަށެވެ.

އަދި 919 ސޭފްޓީ ސެންޓަރެއްގައި 34,198 އާއިލާއިން 122,822 މީހަކު ތިބިކަމަށް އެ ސެންޓަރުން ބުނެފައިވެއެވެ.

އެ ސެންޓަރުން އާންމުކޮށްފައިވާ މައުލޫމާތުން އެނގޭ ގޮތުގައި އެންމެ ގިނަ މީހުން މަރުވެފައި ވަނީ ބަޑުއްލާ އަދި ކެންޑީއިންނެވެ. އެއީ ކޮންމެ ޑިސްޓްރިކްޓަކުން 52 މީހުންނެވެ. އެންމެ ގިނަ މީހުން ގެއްލިފައި ވަނީ ވެސް ކެންޑީއިންނެވެ. އެއީ 102 މީހުންނެވެ. ބަޑުއްލާއިން 42 މީހަކު ގެއްލިގެން ރިޕޯޓުކޮށްފައިވެއެވެ.

މި މީހުންނަށް ބޭނުންވާ އަސާސީ އެހީތައް ފޯރުކޮށްދިނުމުގެ މަސައްކަތް ލަންކާ ސަރުކާރުގެ އިތުރުން އެހީދޭ ޖަމިއްޔާތަކުން ދަނީ ކުރަމުންނެވެ.

ބައެއް ސަރަހައްދުތަކުން ވިއްސާރަ ކޮންމެވެސް ވަރަކަށް މަޑުޖެހިފައިވީ ނަމަވެސް، ގިނަ ޑިސްޓްރިކްޓްތަކުގައި ނުރައްކާ އަދިވެސް ބޮޑު ކަމަށް ޑީއެމްސީން ހާމަކުރެއެވެ. ވިއްސާރައިގެ ސަބަބުން ގެއްލުންވެފައިވާ ބޮޑެތި ސަރަހައްދުތަކުގައި ކަމާބެހޭ ފަރާތްތަކުން ދަނީ ސަލާމަތްކުރުމާއި، އެހީ ދިނުމުގެ އިތުރުން، ނުރައްކާތެރި ހިސާބުތަކުގައި ތިބި މީހުން އެހެން ތަންތަނަށް ބަދަލުކުރުމުގެ މަސައްކަތް ބާރަށް ކުރަމުންނެވެ.

ހާލަތު ރަނގަޅުވަންދެން ރައްކާތެރިކަމަށް ސަމާލުވުމަށް ލަންކާ ސަރުކާރުން ވަނީ ރައްޔިތުންނަށް އިލްތިމާސްކޮށްފައެވެ.