ކޮންމެ ހާލަތެއްގައި ވެސް ރާއްޖެއިން ދައްކައިދެނީ ލަންކާއާއެކު އޮތް އަހުވަންތަކަން: ހައިކޮމިޝަނަރު
30 ނޮވެމްބަރު 2025 - 06:53

ސްރީލަންކާއަށް ދިމާވި ދަތި ކޮންމެ ހާލަތެއްގައި ވެސް ދިވެހިރާއްޖޭގެ ރައްޔިތުންނާއި ސަރުކާރުން ދައްކައިދީފައިވަނީ ދެ ގައުމުގެ ދެމެދުގައި އޮތް އަހުވަންތަކަމުގެ ވަރުގަދަ ގުޅުންކަމުގައި ރާއްޖޭގައި ހުންނަވާ ސްރީލަންކާގެ ހައިކޮމިޝަނަރު މުޙައްމަދު ރިޒްވީ ޙަސަން ވިދާޅުވެއްޖެއެވެ.
ހައިކޮމިޝަނަރު މިފަދައިން ވިދާޅުވީ، ތޫފާން 'ދީތުވާ'ގެ ސަބަބުން ސްރީ ލަންކާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ޕަބްލިކް ސާވިސް މީޑިއާ (ޕީއެސްއެމް) އިސް ނަގައިގެން ރާއްޖޭގެ ގިނަ މީޑިއާތަކެއްގެ ބައިވެރިވުމާއެކު ކުރިއަށް ގެންދާ ޓެލެތޯންގެ ތެރެއިން ދެއްވި އިންޓަވިއުއެއްގައެވެ.

Ad by Hajj Corporation
އޭނާ ވިދާޅުވީ، ރާއްޖޭގެ އާންމު ރައްޔިތު މީހާއިން ފެށިގެން ރައީސުލްޖުމްހޫރިއްޔާއާ ހަމައަށް، ސްރީލަންކާއާއެކު ބާއްވަވާ އަހުވަންތަ ގާތް ގުޅުމަށް ޝުކުރު ދަންނަވާ ކަމަށެވެ. މިހާރު ކުރިމަތިވެފައިވާ ހާލަތާއި، މީގެކުރިން ދިމާވި ދަތި އުނދަގޫ ހާލަތުގައި ވެސް، އެއް އާއިލާއެއްގެ ގޮތުގައި، އާއިލާގެ މެމްބަރުންތަކަކަށް އެހީތެރިވާ ފަދައިން ދިވެހިރާއްޖެއިން ސާބިތުކަމާއި އެއްބައިވަންތަކަމާއެކު ލަންކާއާއެކު ތިބިކަން ހައިކޮމިޝަނަރު ފާހަގަކުރެއްވިއެވެ.
މިހާރު ކުރިމަތިވެފައިވާ ގުދުރަތީ ކާރިސާގެ ސަބަބުން ވަމުންދާ ގެއްލުންތަކުން އަރައިގަންނަން ކުރަމުންދާ މަސައްކަތުގައި، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އިސްނެންގެވުމާއި އިރުޝާދުގެ ދަށުން ރާއްޖެއިން ވަމުންދާ އެހީތެރިކަން ފާހަގަކުރައްވައި، ރައީސް ޑރ. މުއިއްޒު އަށް ވަރަށް ޙާއްސަ ޝުކުރެއް ހައިކޮމިޝަނަރު އަރިސްކުރެއްވިއެވެ.
އަދި އެހީތެރިކަން ފޯރުކޮށްދިނުމުގައި ސަރުކާރާއި ގުޅުންހުރި ފަރާތްތަކުން ހިންގާ ހަރަކާތްތައް ކުރިއަށް ގެންދާނެ މަގު ފަހިކޮށްދެއްވައި، އިރުޝާދު ދެއްވައި ހުރިހާ ކަމެއް ވެސް ވަރަށް ފުރިހަމައަށް ގެންގޮސްދިނުމުގައި ރައީސް ކުރައްވަމުން ގެންދަވާ މަސައްކަތްޕުޅު ވެސް ހައިކޮމިޝަނަރު ފާހަގަކުރެއްވިއެވެ.
ރާއްޖޭގެ ރައްޔިތުންނާއި ރާއްޖޭގައި ދިރިއުޅޭ ލަންކާގެ ރައްޔިތުން ވެސް، ދިވެހިންނާއި ރައީސް ޑރ. މުއިއްޒު އެ ގައުމާ މެދު ބަހައްޓަވާ ގާތްކަމާއި އެހީތެރިކަން، ވަރަށް ޝުކުރުވެރި ހިތަކުން ބަލައިގަންނަކަމަށް ވެސް އޭނާ ވިދާޅުވިއެވެ.
ރާއްޖެއިން ލަންކާއާ މެދު ބަހައްޓާ ގާތްކަމަށް ލަންކާގެ ހައިކޮމިޝަނަރު ޝުކުރު އަދާކުރެއްވިއިރު، ދިވެހި ސަރުކާރުން ވަނީ، އެގައުމަށް އެހީގެ ގޮތުގައި 50،000 އެމެރިކާ ޑޮލަރުގެ އިތުރުން 25،000 މަސްދަޅު ކޭސް ހަދިޔާކުރަން ނިންމާފައެވެ.
އަދި ލަންކާއަށް އެހީވުމަށް ދައުލަތުގެ މީޑިއާއިން އިސްނަގައިގެން، 34 މީޑިއާއެއްގެ ބައިވެރިވުމާއެކު ކުރިއަށް ގެންދާ ހާއްސަ ޓެލެތޮން ފެށިތާ 3 ގަޑިއިރު ހަމަވިއިރު، 200،000 އެއްހައި ދިވެހި ރުފިޔާއާއި 300 އަށްވުރެ ގިނަ ޔޫއެސް ޑޮލަރި، ދިވެހިން ވަނީ ހަދިޔާކޮށްފައެވެ. މި ޓެލެތޯން މިރޭ ދަންވަރު 01:00 އާ ހަމައަށް ކުރިއަށް ދާނެއެވެ.


