އަވަށްޓެރި ސްރީލަންކާއަށް ކުރިމަތިވެފައިވާ ހާލަތުން އަރައިގަތުމަށް ކުރަމުންދާ މަސައްކަތުގައި ދިވެހި ރައްޔިތުން އެހީވާން ދެމިތިބޭނެކަން މިއަދު ފެނިގެންދާނެކަމަށް އުއްމީދުކުރައްވާކަމަށް ދައުލަތުގެ މީޑިއާ، ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޔާމީން ރަޝީދު ވިދާޅުވެއްޖެއެވެ.

ޔާމީން މިހެން ވިދާޅުވީ، ސްރީލަންކާއަށް ދިމާވެފައިވާ ހިތާމަވެރި ކާރިސާގައި ދިވެހިންގެ ފަރާތުން އެހީވުމަށް ކުރިއަށްގެންދާ "ސިލޯނާއެކު ދިވެހިން" ޓެލެތޯންގައި ވާހަކަދައްކަވަމުންނެވެ.

Ad by Hajj Corporation

މި ޓެލެތޯނަކީ ތޫފާން 'ދީތުވާ'ގެ ސަބަބުން ސްރީ ލަންކާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ޕަބްލިކް ސާވިސް މީޑިއާ (ޕީއެސްއެމް) އިސް ނަގައިގެން ރާއްޖޭގެ ގިނަ މީޑިއާތަކެއްގެ ބައިވެރިވުމާއެކު ކުރިއަށް ގެންދާ ޓެލެތޯން އެކެވެ.

37 މީޑިއާއެކު ކުރިއަށް ގެންދާ މި ޓެލެތޯން މިހާރު ފަށާފައިވާއިރު މިރޭ މެންދަމު 1:00ޖެހުމާ ހަމައަށް މި ޓެލެތޯން ކުރިއަށް ދާނެއެވެ. މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށާއި ޖަމްޢިއްޔާ، ޖަމާޢަތް، ކްލަބްތަކާއި އޮފީސްތައް ފަދަ ހުރިހާ ތަންތަނަށްވެސް ވަނީ ހުޅުވާލާފައެވެ.

މި ޓެލެތޯން ފެށުމަށް ބޭއްވި ހަރަކާތުގައި ވާހަކަދައްކަވަމުން ޔާމީން ވަނީ، މި ޓެލެތޯން މެދުވެރިކޮށް، ލަންކާއަށް އެހީވުމުގައި ދިވެހި ރައްޔިތުންގެ އެއްބާރުލުމަށް އެދިވަޑައިގެން، މި މަސައްކަތުގައި ބަރަކާތް ލެއްވުން އެދި ﷲ ގެ ހަޛްރަތުން ދުޢާ ދަންނަވާފައެވެ.

އަދި، ސްރީލަންކާއާއެކު ދިވެހިން ވަރަށް ވަރުގަދައަށް ތިބިކަން މިއަދު ފެނިގެންދާނެކަމަށް އުއްމީދުކުރައްވާކަމަށް ވެސް ޔާމީން ވިދާޅުވިއެވެ.

ޔާމީން ރަޝީދު ވިދާޅުވީ މިއީ ގައުމީ ފެންވަރުގައި ކުރިއަށްގެންދާ ހަރަކާތެއް ކަމަށާއި މި ހަރަކާތަކީ ލަންކާއާ ދިވެހިންނާ މެދު އޮންނަ ޒަމާންވީ ގުޅުމުގެ މައްޗަށް ބިނާކޮށް ދިވެހިން ލަންކާއާއެކު އެއްބައިވަންތަކޮށް ތިބިކަން ރަމްޒުކޮށްދޭ ކަމެއް ކަމަށެވެ.

މި ޓެލެތޯނުގައި މާލެއާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން ފަންޑަށް އެހީވުމަށް ފަސޭހަ ގިނަ އިންތިޒާމްތަކެއްވަނީ ހަމަޖައްސާފައެވެ. އެގޮތުން ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާ ކުރެވޭނެ އިންތިޒާމްވަނީ ހަމަޖައްސާފައެވެ. އަދި ނަގުދު ފައިސާ، ޓްރާންސްފަރ އަދި ބޭންކް ޗެކް މެދުވެރިކޮށްވެސް މިޓެލެތޯނަށް ފައިސާ ޖަމާކުރެވޭނެއެވެ.

ޓެލެތޯނަށް ލިބޭ ފައިސާ ޖަމާކުރުމަށް ޚާއްސަ އެކައުންޓެއްވެސްވަނީ ހަދާފައެވެ.

ޓެލެތޯނަށް ބޭނުން ކުރާ އެކައުންޓް ނެމްބަރުތައް:

ރުފިޔާ އެކައުންޓް ނަން: ސިލޯނާއެކު ދިވެހިން

އެކައުންޓް ނެމްބަރު: 7730000796107

ޑޮލަރު އެކައުންޓް ނަން: ސިލޯނާއެކު ދިވެހިން

އެކައުންޓް ނެމްބަރު: 7730000796106

ޕީއެސްއެމުން އިސްނަގައިގެން، މީޑިއާތަކުގެ ބައިވެރިވުމާއެކު މީގެ ކުރިން ވެސް ގައުމުތަކަށް އެހީތެރިވުމުގެ ގޮތުން މިފަދަ ޓެލެތޯންތައް ބާއްވާފައިވެއެވެ. އެގޮތުން އެންމެ ފަހުން ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން ރާއްޖޭގެ މީޑިއާތަކާއި ގުޅިގެން ބޭއްވި ޓެލެތޯން ވެސް ވަރަށް ފުރިހަމަކަމާއެކީ ވަނީ ކުރިއަށް ގެންގޮސްފައެވެ.