މާލެ ސަރަހައްދުގެ ޕާކިން މައްސަލަތަކަށް ހައްލެއް ހޯދަން ހުޅުމާލޭގައި 4،000 ޕާކިން ޔުނިޓު އެކުލެވޭ ގޮތަށް 15 ޕާލކިން ބިލްޑިން އަޅަން ޓްރާންސްޕޯޓް މިނިސްޓްރީން މިއަދު ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.

މިކަމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު އަމީނެވެ. އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ފަޒުލް ރަޝީދެވެ.

މި ރަސްމިއްޔާތަށް ފަހު ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ ޕާކިން ބިލްޑިން ޔުނިޓްތައް އަޅައި ނިމުމުންއެ ޕާކިން ބިލްޑިން ގާނޫނުގެ ތެރެއިން ވެހިކަލްތަކެއް ރެޖިސްޓްރީ ކުރެވޭނެ ފުރުސަތު ލިބޭނެ ކަމަށެވެ.

އެޗްޑީސީއާ ހަވާލުކޮށްގެން ހަދާ ޕާކިން ޔުނިޓްތަކުގެ 10 ޕަސެންޓަކީ ވަގުތީ ގޮތުން ޕާކް ކުރަން ދޫކުރާ ޔުނިޓްތަކެވެ. އަދި ބާކީ ހުރި ޔުނިޓްތައް ގަންނަ ފަރާތްތަކަށް ވިއްކައި، އެ ޔުނިޓްތައް ރަޖިސްޓަރީކޮށް ދޭނެ އެވެ.

މި ބިލްޑިން ޔުނިޓްތަގައި އިލެކްޓްރިކް ވެހިކަލް ޗާޖް ވެސް ކުރެވޭނެ އެވެ. އަދި އެތަނުގައި ބޭނުންކުރާ ހަކަތަ އުފެއްދުމަށް ނިންމާފައި ވަނީ އިއާދަކުރެނިވި ހަކަތައިންނެވެ.

ބިލްޑިންތަކުގެ ޓެރަސް ވިޔަފާރި ބޭނުންތަކަށް ކުއްޔަށް ވެސް ދެވޭނެ އެވެ. އެގޮތުން ކެފޭ/ރެސްޓޯރެންޓު އަދި ސްޕޯޓްސް އެރީނާތައް ފަދަ ތަންތަން ހިންގަން ޖާގަ ދެވޭނެ އެވެ.