ހާއްސަ ހާލަތް ތަކުގައި ޕެންޝަން ފައިސާ ނެގޭގޮތަށް ލުއިތަކެއް ދިނުމަށް ޕެންޝަނާ ބެހޭ ގާނޫނު އިސްލާހު ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ހެންވޭރުގެ ރައްޔިތުންނާ އެކު ކަލާފާން ސްކޫލުގައި ރޭ ބޭއްވެވި ބައްދަލުކުރެއްވުމުގައި އާންމު ރައްޔިތަކު ކުރެއްވި ސުވާލަކަށް ޖަވާބު ދެއްވަމުން ރައީސް ވިދާޅުވީ ޕެންޝަން ފަންޑުން ފައިސާ ނެގޭނެ އިތުރު ފުރުސަތުތައް ފަހިކޮށްދިނުމުގެ ގޮތުން ގާނޫނު އިސްލާހު ކުރުމުގެ މަސައްކަތް ކުރަމުންދާ ކަމަށެވެ.

Ad by Hajj Corporation

އަދި ޕެންޝަން ގާނޫނަށް ގެންނަން ބޭނުންވާ އިސްލާހުތައް މަޖިލީހުގެ ކުރިއަށް އޮތް ދައުރަށް ހުށަހަޅުއްވާނެ ކަމަށާއި،ޕެންޝަން ފަންޑުގެ ބޭނުން ހިފޭގޮތަށް މިހާރުވެސް ބައެއް އިސްލާހުތައް ގެނެސްފައިވާ ކަންވެސް ރައީސް ފާހަގަކުރެއްވި އެވެ.

"ހާއްސަ ހާލަތްތަކުގައި ޕެންޝަން ފަންޑުން ފައިސާ ބޭނުންކުރެވޭ ގޮތަށް އާދެ އެ ހާއްސަ ހާލަތްތައް އޭގައި ބަޔާންކުރެވޭނެ، އެހެންވީމަ މިހާރަށް ވުރެ ގިނަ ފުރުސަތުތައް އެމީހާގެ ޕެންޝަން ފައިސާ ބޭނުންކުރެވޭ ގޮތަށް ގާނޫނަށް އިސްލާހު އެބަ ހުށަހަޅަން" ރައީސް ޑރ މުހައްމަދު މުއިއްޒު

ސަރުކާރުން ގެންނަން ބޭނުންވާ އިސްލާހުތަކާ ގުޅޭ ތަފްސީލްތައް ރައީސް މުއިއްޒު ހިއްސާކުރައްވާފައެއް ނުވެ އެވެ.

ޕެންޝަން ފަންޑުން ޖަމާކުރާ ފައިސާ އެކި ބޭނުންތަކުގައި ބޭނުންކުރެވޭ ގޮތް ހެދުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.