ހޯމަ ދުވަހު ޖަޕާނުގެ އުތުރު-އިރުމަތީ ކަނޑުގެ ސަރަހައްދަށް 7.6 މެގްނިޓިއުޑްގެ ބާރުގަދަ ބިންހެލުމެއް އައުމާ ގުޅިގެން އެ ގައުމުގެ ބައެއް ސަރަހައްދުތަކަށް ސުނާމީގެ އިންޒާރު ދީ، ރައްކާތެރި ހިސާބުތަކަށް ދިޔުމަށް ރައްޔިތުންނަށް ވަނީ އަންގާފައެވެ.

މި ބިންހެލުމުގެ ސަބަބުން ބޮޑެތި ރާޅުތަކެއް އަރާނެ ކަމަށް ލަފާކުރެވޭތީ، ރައްޔިތުންގެ ސަލާމަތަށްޓަކައި އަވަސް ފިޔަވަޅުތަކެއް ވަނީ އަޅާފައެވެ.

Ad by Hajj Corporation

ޖަޕާނުގެ މޫސުމާބެހޭ އެޖެންސީ އިން ބުނި ގޮތުގައި، އެ ގައުމުގެ ބައެއް ހިސާބުތަކަށް 10 ފޫޓަށް (3 މީޓަރަށް)ވުރެ އުސް ސުނާމީއެއް އެރުން އެކަށީގެންވެއެވެ.

މި އިންޒާރުގެ ސަބަބުން ކަނޑުގެ އައްސޭރިފަށުގައި ދިރިއުޅޭ މީހުންނަށް ވަގުތުން ރައްކާތެރި ހިސާބުތަކަށް ދިޔުމަށް ވަނީ އިލްތިމާސްކޮށްފައެވެ.

މި ބާރުގަދަ ބިންހެލުން އައިސްފައިވަނީ ކަނޑުގެ ތެރޭގައި ގާތްގަނޑަކަށް 44 މޭލު (70 ކިލޯމީޓަރު) ބޭރުން، އަދި 33 މޭލުގެ އަޑިންނެވެ. މިފަދަ ބިންހެލުންތަކަކީ ސުނާމީގެ ނުރައްކާ ބޮޑުކުރާ ކަމެކެވެ.

ޖަޕާނަކީ ދުނިޔޭގެ އެންމެ ބޮޑެތި ބިންހެލުންތައް އަންނަ ސަރަހައްދު ކަމަށްވާ 'ރިންގް އޮފް ފަޔަރ' ގެ ތެރޭގައި އޮންނަ ގައުމަކަށްވާތީ، ބާރުގަދަ ބިންހެލުންތަކާ ގިނައިން ކުރިމަތިލާން ޖެހެއެވެ.