އެމެރިކާގެ ރައީސް ޑޮލަންލްޑް ޓްރަމްޕްގެ އިސް އޮފިޝަލުން ކަމަށްވާ ރޮބަޓް ކެނެޑީ ޖޫނިއަރ އާއި ޝޯން ޑަފީ، އެބޭފުޅުންގެ ހަށިގަނޑުގެ ބާރު ދައްކާލުމަށް އެއާޕޯޓެއްގެ ތެރޭގައި ޕުލް-އަޕްސް ހަދައިފިއެވެ.

އެމެރިިކާގެ ޓްރާންސްޕޯޓޭޝަން ސެކްރެޓަރީ އާއި ހެލްތު އެންޑް ހިއުމަން ސަރވިސަސް ސެކްރެޓަރީ، މި ހޯމަ ދުވަހު ވާޖިނިއާގެ އަރްލިންގްޓަންގައި ހުންނަ ރޮނާލްޑް ރީގަން ނޭޝަނަލް އެއާޕޯޓަށް ވަޑައިގެންނެވީ، ޗުއްޓީ ދުވަސްތަކާ ދިމާކޮށް ފަށާފައިވާ، އާ "ޢާއިލާއާ ރައްޓެހި" ދަތުރުފަތުރުގެ ކެމްޕޭން އިފްތިތާޙް ކުރުމުގެ ބޭނުމުގައެވެ.

Ad by Hajj Corporation

ނަމަވެސް މި ހަރަކާތް ވަރަށް އަވަހަށް ބަދަލުވެގެންދިޔައީ، 71 އަހަރުގެ ކެނެޑީ އާއި 54 އަހަރުގެ ޑަފީ، އެއާޕޯޓުގެ މެދުތެރޭގައި ކެމެރާގެ ކުރިމަތީގައި އެބޭފުޅުންގެ ހަށިގަނޑުގެ ބާރު ދައްކާލުމަށެވެ. ޢާއިލާއާ ރައްޓެހި ޚިދުމަތްތަކާއި، ސިއްޙަތަށް ފައިދާހުރި ކާނާ އިތުރު ކުރުމުގެ މަސައްކަތް އިޢުލާނު ކުރެއްވުމަށްފަހު، އެ ދެ ބޭފުޅުން ވަޑައިގެންނެވީ މައި ހޯލުގެ މެދުގައި، ފާޚާނާއެއްގެ ކުރިމަތީގައި ހުރި ޕުލް-އަޕް ބާރާއި ދިމާލަށެވެ.

ކެނެޑީ، އޭނާގެ ގަމީސް ތިރިއަށް ދޫކޮށްލާފައިވާ ހާލަތުގައި، ޓައީ އަޅައިގެން ހުރެ، ބުރަ މަސައްކަތަކަށްފަހު 20 ޕުލް-އަޕްސް ހެއްދެވިއެވެ. އޭނާ ނިންމެވުމަށްފަހު، ޑަފީ އޭނާގެ ޖެކެޓާއި ޓައި ނެގުމަށްފަހު، ޕުލް-އަޕްސް ހެއްދެވިއެވެ.

ޑަފީ ވިދާޅުވީ، މިކަމުގެ ސަބަބުން މުޅި ހަށިގަނޑުން ދާހިއްލައިގެން، ނުބައި ވަސް ދުވާފާނެ ކަމަށާއި، މިއީ "ޖިމަށް ގޮސް، ދާހިއްލާފައި، އެއާޕްލޭނަށް އަރާކަހަލަ ކަމެއް ނޫން" ކަމަށެވެ.

ޑަފީ 10 ޕުލް-އަޕްސް ހެއްދެވިއިރު، އޭނާގެ ވަށައިގެން ތިބި މީހުން އުފަލުން ހަޅޭއްލެވިއެވެ. އަދި އެއާޕޯޓުން ދަތުރުކުރަމުން ދިޔަ ބައެއް މީހުންނަށް މި އާދަޔާޚިލާފު މަންޒަރު ފެނި، އެމީހުން ހައިރާންވެގެން ބަލަން ތިއްބެވެ.

މި ހަރަކާތުގެ މައިގަނޑު މަޤްޞަދަކީ، ދަތުރުވެރިންގެ ތަޖުރިބާ ރަނގަޅު ކުރުމަށް އެއާޕޯޓުތަކަށް އެހީވުމަށް ސަރުކާރުން ހަމަޖައްސާފައިވާ 1 ބިލިއަން ޑޮލަރުގެ ޕްރޮގްރާމް އިޢުލާނު ކުރުމެވެ.

އެބޭފުޅުން ހުށަހެޅި ބައެއް ޚިޔާލުތަކުގެ ތެރޭގައި، އެއާޕޯޓުތަކުގައި ކަސްރަތު ކުރާނެ ތަންތަން ޤާއިމު ކުރުމާއި، ނަރުސްކަން ކުރާ މައިންނަށް ޚާއްސަ ކޮޓަރިތައް އިތުރު ކުރުން ހިމެނެއެވެ. މި ދެ ސެކްރެޓަރީންނާއެކު، ދަތުރުވެރިންނަށް ސިއްޙަތަށް ފައިދާހުރި ކާނާ ވިއްކާ ވެންޑިންގ މެޝިން ހަދާ ކުންފުންޏެއް ކަމަށްވާ ފާމަރސް ފްރިޖްގެ ސީއީއޯ، އަދި މަޝްހޫރު ޕޯލް ސަލާދިން އާއި ކޮންސަވޭޓިވް ކޮންޓެންޓް ކްރިއޭޓަރ އަދި މަންމައެއް ކަމަށްވާ އިޒަބެލް ބްރައުން ވެސް ބައިވެރިވިއެވެ.

ކެނެޑީ އޭނާގެ ވާހަކައިގައި ވިދާޅުވީ، އެއާޕޯޓުތަކަކީ "ސިއްޙަތަށް ފައިދާހުރި ކާނާ ނެތިދާ ތަންތަން" ކަމަށާއި، އަދި އެއާޕޯޓުތަކުން އާ ކާނާގެ ބާވަތްތައް ފޯރުކޮށްދިނުމަށް ކުރާ މަސައްކަތްތަކަށް ތަޢުރީފު ކުރެއްވިއެވެ. ޑަފީ ވިދާޅުވީ، ޢާއިލާތަކުން އެއްތަނެއްގައި އިށީނުމަށް ފައިސާ ނެގުން މަނާ ކުރުމުގެ މަސައްކަތުގެ އެންމެ ފަހުގެ މަޢުލޫމާތެއް އޭނާއަށް ލިބިފައި ނުވާ ކަމަށާއި، ނަމަވެސް 2024 ވަނަ އަހަރަށް ހުށަހަޅާފައިވާ މި ޤަވާޢިދު މިހާރު ދިރާސާ ކުރަމުންދާ ކަމަށެވެ.

"ދަތުރުފަތުރު އަނެއްކާވެސް ޢާއިލާއާ ރައްޓެހި ކުރަން" މި ނަމުގައި ފެށި މި ކެމްޕޭން ފަށާފައިވަނީ، މިދިޔަ މަހު ހެލްތް މިނިސްޓްރީން "ދަތުރުފަތުރުގެ ރަން ޒަމާން ފެށެނީ ތިބާއިން" މި ނަމުގައި ފެށި ކެމްޕޭނަށްފަހުގައެވެ.