ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޤަތަރުގެ ޤައުމީ ދުވަހުގެ މުނާސަބަތުގައި އެޤައުމުގެ އަމީރު ޝެއިޚް ތަމީމް ބިން ޙަމަދު އަލް-ޘާނީއަށާއި ބޮޑުވަޒީރު ޝެއިޙް މުހައްމަދު ބިން އަބްދުއްރަހްމާން ބިން ޖާސިމް އަލް-ޘާނީއަށް ތަހުނިޔާ ފޮނުއްވައިފިއެވެ.

ދުވަހުގެ މުނާސަބުތާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ޤަޠަރަކީ އަބަދުވެސް ދިވެހިރާއްޖޭގެ އިތުބާރުކުރެވޭ، ގާތް އެކުވެރިއެއްގެ އިތުރުން ދިވެހިރާއްޖޭގެ ތަރައްޤީގެ ބައިވެރިއެއް ކަމަށެވެ. ޤަޠަރުގެ ދީލަތި އެހީގެ ސަބަބުން ރާއްޖެއަށް އޭގެ އަގު އަދާނުކުރެވޭހައި ގިނަ މަންފާ ލިބިފައިވާ ކަމަށް ރައީސްގެ ޕޯސްޓުގައި ވިދާޅުވެފައިވެއެވެ.

Ad by Hajj Corporation

ރައީސްގެ ޕޯސްޓުގައި ވަނީ، ޤަޠަރުގެ އަމީރުގެ އިތުރުން ބޮޑުވަޒީރަށާއި އެޤައުމުގެ ލޮބުވެތި، އަޚުވަންތަ ރައްޔިތުންނަށް ޤައުމީ ދުވަހުގެ ތަހުނިޔާ ފޮނުއްވާފައެވެ.

ކޮންމެ އަހަރެއްގެ ޑިސެމްބަރު މަހުގެ 18 ވަނަ ދުވަސް ޤަޠަރުގެ ޤައުމީ ދުވަހުގެ ގޮތުގައި ފާހަގަކުރެވެނީ، 1878 ވަނަ އަހަރުގެ ޑިސެމްބަރ މަހުގެ 18 ވަނަ ދުވަހު، ޖާސިމް ބިން މުޙައްމަދު އަލް-ޘާނީ އެޤައުމުގެ ވެރިކަމާ ޙަވާލުވެވަޑައިގަތް ދުވަހުގެ މުނާޞަބަތުގައެވެ. ޤަޠަރުގެ ރައްޔިތުން އެއްބައިވަންތަ ކުރައްވާ، އިނގިރޭސީން ފަދަ އިސްތިޢުމާރީން ޤަޠަރުން ނެރެލެއްވުމުގައި އެންމެ އިސް ދައުރެއް އަދާކުރެއްވިކަމަށް ބެލެވެނީ އެމަނިކުފާނެވެ.