މަގުތަކުގައި ބަހައްޓާފައިވާ ލަކުޑި ޕެލެޓްތަކާއި ދަގަޑު ޕެލެޓްތައް ނުނަގައި ވިޔަފާރި ސަރަހައްދުތަކުގައި ބަހައްޓާފައިވާ ޑަސްޓްބިންތައް ނަގަން އެންގުމަކީ ހައްލެއްނޫންކަމަށް ވިދާޅުވެ އެކަމުގެ ކަންބޮޑުވުން ރައްޔިތުންގެ މަޖިލީހުގެ މައްޗަންގޮޅި މެދު ދާއިރާގެ މެމްބަރު އަހުމަދު ޒަމީރު ފާޅުކުރައްވައިފިއެވެ.

މެމްބަރު ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ ތޮއްޖެހިފައިވާ ވެރިރަށް މާލޭގައި ޓޭކްއަވޭ ވިޔަފާރިތައް ހުޅުވުމުގެ ހުއްދަ މާލޭ ސިޓީ ކައުންސިލުން ދެމުން އަންނަނީ އޮއްނަ އުސޫލުގެ ދަށުންކަމަށެވެ. މިފަދަ ވިޔަފާރިތަކަށް ފުރުސަތު ލިބެންޖެހޭކަމަށާއި ނަމަވެސް އެފަދަ ތަންތަނުގެ ކައުންޓަރުތައް ހުންނަނީ މަގުގެ އިންފާރުގައި، މަގުތަކުގެ ދުވާރުމަތީގައި ނުވަތަ ދުވާރުނެއް މަގުތަކުގައިކަމަށް މެމްބަރު ވިދާޅުވިއެވެ.

މަގުގައި ވިޔަފާރިކުރުމުގެ މައްސަލަ ބޮޑުވެ މަގު ތޮއްޖެހުމުން، ހިގަން ޖާގަނެތި، ހިނގާ މީހާ ޖެހެނީ އުޅަނދު ދުއްވަން އޮއްނަ މަގަށް ފައިބައިގެން ދުއްވާ އެއްޗެހީގެ ނުރައްކަލާ ކުރިމަތިލާންކަމަށް މެމްބަރު ވިދާޅުވިއެވެ.

ދުވާރު ނެތް މަގުތަކުގައި ބަހައްޓާފައިވާ ލަކުޑި ޕެލެޓްތަކާއި ދަގަޑު ޕެލެޓްތަކަކީ ހިނގާބިނގާވެ އުޅޭ މީހުންނާއި ވެހިކަލްތަކަށް ނުރައްކާތެރިގޮތަކަށްހުރި އެއްޗެހިތަކެއްކަމަށާއި މިތަކެތި ނުނަގާ ހަމައެކަނި މިފަދަ ވިޔަފާރި ސަރަހައްދުތަކުގައި ބަހައްޓާފައިވާ ޑަސްޓްބިންތައް ނަގަން ވިޔަފާރިވެރިޔާއަށް ސިޓީ ކައުންސިލުންގެ އޮފިޝަލުން އެންގުމުން މަގުތައް ގޮނޑުވެ، އާންމު ސާފުތާހިރުކަން ގެއްލިފައިވާކަން މެމްބަރު ފާހަގަކުރެއްވިއެވެ.

ވިޔަފާރިވެރިންނާ މަޝްވަރާކޮށް ޒޯނިން ގަވާއިދު ނުވަތަ ވިޔަފާރި ޕްލޯޕްލޭނަށް އަވަސް ހައްލެއް ހޯދަންޖެހޭކަމަށާއި ހަމައެކަނި ޑަސްޓްބިންތައް ނަގަން އެންގުމަކީ ހައްލުކަމަށް ދެކިވަޑައިނުގަންނަވާކަމަށް މެމްބަރު ވަނީ ވިދާޅުވެފައެވެ.

ޕާކްކުރަން ދަތިވާގޮތަށް މާލޭގެ މަގުތަކުގައި ގަވާއިދާ ހިލާފަށް ބަހައްޓާފައިހުރި ޕެލެޓްތައް ނެގުމުގެ މަސައްކަތް މީގެ ކުރިންވެސް ސިޓީ ކައުންސިލުން ވަނީ ކޮށްފައެވެ.