ބޭނުންފުޅު ވަނީ ސަރުކާރާއި ގުޅިގެން ރައްޔިތުންނަށް ކަންކަން މަގުފަހިކޮށްދޭނެ ވެރިންތަކެއް ކަމަށާއި، ބޭނުންވަނީ ޖަވާބުދާރީކުރުވުމަށް ކަމަށް ބުނެ ކަންކަމަށް ހުރަސްއަޅާ ވެރިންތަކެއް ނޫން ކަމަށް ރައީސުލްޖުމްހޫރިއްޔާ ނައިބު އަލްއުސްތާޛް ހުސައިން މުޙައްމަދު ލަތީފް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބަށް ޕީއެންސީގެ ފަރާތުން މާލެ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓު މޫސާ އަލީ ޖަލީލުގެ ކެމްޕެއިން އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

Ad by Hajj Corporation

ނައިބު ރައީސް ވަނީ ރައީސުލްޖުމްހޫރިއްޔާ މަސައްކަތް ކުރައްވާ ސްޕީޑުގައި މަސައްކަތް ކުރެވޭނެ ވެރިންތަކެއް ހޮވުމަށް ގޮވާލައްވާފައެވެ. އަދި މާލެ ސިޓީއަކީ ބޮޑު ތާރީޚެއް އޮތް ތަނެއް ކަމަށާއި އެތާރީޚުގެ ތެރެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ މާލެ ސިޓީގެ މޭޔަރުކަން ކުރެއްވި ބޭފުޅުންގެ ތެރެއިންވެސް ރައްޔިތުންގެ ކުލުނާއި ލޯތްބާއި އިޙްތިރާމް ލިބިވަޑައިގެން ހުންނެވި ބޭފުޅެއް ކަމަށް ވެސް ވިދާޅުވިއެވެ.

ނައިބު ރައީސް އިތުރަށް ވިދާޅުވި އެމަނިކުފާނު މާލެ ސިޓީއަށް ތަޞައްވުރު ކުރެއްވި ކަންކަން މެނިފެސްޓޯގައި ހިމަނުއްވައިގެން އެމަސައްކަތްތައް މިހާރުވެސް ކުރިއަށް ގެންދަވާ ކަމަށް ވިދާޅުވިއެވެ. އަދި މާލެސިޓީއަށް ދިމާވެފައިވާ ބައެއް ކަންކަމަށް އަލިއަޅުވާލެއްވިއެވެ. އެގޮތުން މާލެސިޓީ އަކީ ކާރުބާރުބޮޑު ތަނެއްކަން ފާހަގަކުރައްވާ، އެމަނިކުފާނު ވިދާޅުވީ ރައްޔިތުންނަށް އަމާންކަމާއި އޮމާންކަމާއެކު މާލޭގައި އުޅެވެންޖެހޭ ކަމަށެވެ.

ޕާކިން ފަދަ މައްސަލަތައް ފާހަގަކުރައްވާ ނައިބު ރައީސް ވިދާޅުވީ ސަރުކާރުން ރާވާފައިވާ ގޮތަށް ކަންކަން ކުރިއަށް ގެންދިއުމަށް މިހާރުވެސް ސަރުކާރުން މަސައްކަތް ކުރައްވަމުންދާ ކަމަށާއި އެކަމުގައި އެންމެ ބޮޑު އެހީތެރިކަމެއް ވެދެއްވޭނެ އެއްބޭފުޅަކީ މާލެސިޓީގެ މޭޔަރުކަމަށެވެ. ނަމަވެސް މިދިޔަ ދެ އަހަރު ތެރޭގައި އެގޮތަށް ކަން ހިނގާފައި ނުވާކަމަށް ވިދާޅުވިއެވެ.

މީގެއިތުރުން ކުރިއަށް އޮތް ލޯކަލް ކައުންސިލް އިންތިޚާބަށް މާލެއަށް ބޭނުންވަނީ ރައީސުލްޖުމްހޫރިއްޔާ މަސައްކަތް ކުރައްވަމުން ގެންދަވާ ދުވެލީގައި މަސައްކަތް ކުރައްވާ ބޭފުޅެއް ކަމަށް ނައިބު ރައީސް ވިދާޅުވިއެވެ. އަދި އެއީ ޤައުމުދެކެ ލޯބިވާ ފަރާތަކަށް ވާންޖެހޭނެކަން ފާހަގަކުރައްވާ، ނައިބު ރައީސް ވަނީ ޕީއެންސީން އިންތިޚާބުގައި ވާދަކުރައްވަނީ އެފަދަ ބޭފުޅެއް ކަމަށް ވިދާޅުވެފައެވެ.