އިންޑިއާގެ އުއްތަރު ޕްރަދޭޝްގެ ބަރޭލީ ސަރަހައްދުގައި ހުސްކޮށް ހުރި އިމާރާތެއްގެ ތެރޭގައި ޖަމާއަތުގައި ނަމާދުކުރަން ތިބި 12 މީހަކު ހައްޔަރުކޮށް، އެމީހުންގެ މައްޗަށް ދައުވާ އުފުލައިފިއެވެ.

2026 ވަނަ އަހަރުގެ ޖެނުއަރީ މަހުގެ މެދުތެރޭގައި، ބަރޭލީގެ ބިޝާރަތުގަންޖް ސަރަހައްދުގައި އޮންނަ މުޙައްމަދުގަންޖް އަވަށުގައި ހިނގި މި ހާދިސާއާއި ގުޅޭ މައްސަލަ ފެންމަތިވެފައިވަނީ ހުސްކޮށް ހުރި ގެއެއްގެ ތެރޭގައި ބަޔަކު ޖަމާއަތުގައި ހުކުރު ނަމާދުކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވުމާ ގުޅިގެންނެވެ. އެ އަވަށުގެ އެހެން ދީންތަކުގެ ބައެއް މީހުން ވަނީ، އިދާރީ ހުއްދައަކާ ނުލައި އެ ގެއަކީ "ވަގުތީ މަދަރުސާއެއް" ނުވަތަ "ވަގުތީ މިސްކިތެއް" ގޮތުގައި ބޭނުންކުރަމުންދާ ކަމަށް ބުނެ ފުލުހުންނަށް ޝަކުވާ ހުށަހަޅާފައެވެ. މި ޝަކުވާތަކާ ގުޅިގެން ބަރޭލީ ފުލުހުން ވަނީ 12 މީހަކު ހައްޔަރުކޮށް، އަމަންއަމާންކަން ނަގާލުމާ ގުޅޭ ގާނޫނީ މާއްދާތަކުގެ ދަށުން އެމީހުންގެ މައްޗަށް ދައުވާ އުފުލާފައެވެ.

Ad by Hajj Corporation

އަވަށުގެ ބައެއް ރައްޔިތުން ކިޔައިދިން ގޮތުގައި، އެމީހުން އަމިއްލަ ގޭގައި ނަމާދުކުރަން ޖެހުނީ އެންމެ ކައިރީގައި ހުރި މިސްކިތް ގާތްގަނޑަކަށް 3 ކިލޯމީޓަރު ދުރުގައި ހުރުމުންނެވެ. މިހާރު އޮތް ފިނި މޫސުމުގައި ދޮށީ އުމުރުގެ މީހުންނަށް އެހާ ދުރަށް ދަތުރުކުރުން އުނދަގޫވުމުން، ފަސޭހައަކަށްޓަކައި ހަނީފް ނަމަކަށް ކިޔާ މީހެއްގެ ގޭގައި އެއްވީ ކަމަށް އެމީހުން ބުނެފައިވެއެވެ.

މި މައްސަލާގައި ހައްޔަރުކުރި 12 މީހުން މެޖިސްޓްރޭޓެއްގެ ކުރިމައްޗަށް ހާޒިރުކުރުމަށްފަހު، މިހާރު ވަނީ ކަފާލާތުގެ ދަށުން ދޫކޮށްލާފައެވެ. ނަމަވެސް ފުލުހުން ބުނެފައިވަނީ މިކަމުގައި ބައިވެރިވި ކަމަށް ތުހުމަތުކުރެވޭ އިތުރު ތިން މީހަކު ހޯދުމުގެ މަސައްކަތް އަދިވެސް ކުރިއަށްދާ ކަމަށެވެ.

މި ހާދިސާއާ ގުޅިގެން އެސް.ޕީ (ސައުތު) އަންޝިކާ ވަަރުމާ ވަނީ އެކަން ދިފާޢުކުރަށްވައި، މިއީ ރައްކާތެރިކަމުގެ ފިޔަވަޅެއްކަމަށް ވިދާޅުވެފައެވެ. ނަމަވެސް، މި ހައްޔަރުކުރުންތަކާ ގުޅިގެން ސިޔާސީ ފަރާތްތަކުންނާއި ދީނީ މިނިވަންކަމަށް ވަކާލާތުކުރާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.