ކާރިސާތަކާގުޅޭ މަޢުލޫމާތު ބެލެހައްޓަން ސުމޭކު މަންސައެއް އިފުތިތާހުކޮށްފިއެވެ.

'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ)ގެ ނަން ދީފައިވާ އޮންލައިން ޕޯޓަލަކީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ތައާރަފުކުރި މަންސައެކެވެ.

Ad by Hajj Corporation

ޑާލާ ޕޯޓަލް އިފްތިތާޙްކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާފައިވަނީ، ދަޚީލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިހުސާންއެވެ. މި ރަސްމިއްޔާތު ދިފާޢީ ވަޒީރު ޣައްސާން މައުމޫން ބައިވެރިވެވަޑައިގެންނެވިއެވެ.

ޔޫއެންޑީޕީގެ ފަންޑިންގް ވިންޑޯގެ ތެރެއިން، ޑެންމާކް ލަގްޒެމްބާގް އަދި ދެކުނު ކޮރެއާގެ އެހީތެރިކަމާއެކު ތަރައްޤީކޮށްފައިވާ ޑާލާ ޕޯޓަލް އެންޑީއެމްއޭގެ މަސައްކަތްތައް ޑިޖިޓަލައިޒްކޮށް ކާރިސާތަކުގެ މައުލޫމާތު އެއްކޮށް ބެލެހެއްޓުމަށް ތަރައްޤީކޮށްފައިވާ ޕޯޓަލްއެކެވެ.

މި ޕޯޓަލްގެ ސަބަބުން، މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެ ކަމަށް އެންޑީއެމްއޭއިން ވިދާޅުވެއެވެ. އަދި ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެއެވެ.

މީގެ އިތުރުން، ލިބުނު ގެއްލުންތަކުގެ ހިސާބުކޮށް ބަދަލު ދިނުމުގެ މަރުހަލާތައް ޕޯޓަލްގެ ތެރެއިން ފުރިހަމަ ކުރެވިގެންދާނެ ކަމަށް އެންޑީއެމްއޭއިން ބުނެއެވެ.

ޑާލާ ޕޯޓަލް އިފްތިތާޚް ކުރުމަށް ހޮޓެލް ޖެންގައި ބޭއްވި ރަސްމިއްޔާތުގައި ޕޯޓަލް އިފްތިތާޙްކޮށްދެއްވުމަށްފަހު ވާހަކަ ދައްކަވަމުން ވަޒީރު ޢަލީ އިޙްސާން ވަނީ މި މަސައްކަތަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މޯލްޑިވްސް 2.0 ސިޔާސަތާއި ތެރެއިން ކުރެވިގެންދިޔަ މަސައްކަތެއް ކަމަށެވެ.

ވަޒީރު ވިދާޅުވީ ރާއްޖެ ފަދަ ޤައުމަކަށް ވިލުންތެރިކަން ކުރިއެރުވުމަކީ ކޮންމެހެން ކުރަންޖެހޭ ކަމަކަށްވާއިރު، ޑާލާއާއެކު ކާރިސީ ހާލަތުގައި މައުލޫމާތު އެއް މަންސައަކުން ފެނި، އެކަމަށް އަވަހަށް އިޖާބަ ދިނުމަށް މަގުފަހިވާ ކަމަށެވެ. އަދި މިއީ ކަރިސީ ހާލަތުގައި ވަސީލަތްތައް އެންމެ ބޭނުންވާ ސަރަހައްދުތަކަށް އިސްކަންދީގެން ފޯރުކޮށްދިނުމަށް ލިބޭ ވަސީލަތެއް ކަމަށް ވަޒީރު ވިދާޅުވިއެވެ.