ތެލެސީމިއާ ބަލި މީހުންނަށް ބޭނުންވާ ލޭ ހޯދުމުގައި ދިމާވާ ދަތިތަކަށް ޒަމާނީ ހައްލެއް ނުގެނެވޭ ސަބަބު ސާފުކުރަން، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް މިއަދު ސުވާލު ފޮނުއްވައިފިއެވެ.

މެމްބަރު މުހައްމަދު އިބްރާހިމް ހެލްތު މިނިސްޓަރު އަބްދުﷲ ނާޒިމް އިބްރާހިމަށް ސުވާލު ފޮނުއްވީ ލިޔުމުން ޖަވާބު ދޭ ގޮތަށެވެ.

Ad by Hajj Corporation

މިނިސްޓަރަށް ފޮނުއްވި ސުވާލު ނޯޓިސްގައި މެމްބަރު ވަނީ ސިއްހީ ހިދުމަތް ދިނުމުގެ ގާނޫނާއި ތެލެސީމިއާ ކޮންޓްރޯލްކުރުމުގެ ގާނޫނުގައި ކަނޑައަޅާފައިވާ ގޮތަށް، ސިއްހީ ހިދުމަތްދޭ މަރުކަޒުތަކުން ފޯރުކޮށްދެމުން އަންނަ ލޭގެ ފަރުވާތަކާ ބެހޭ ގައުމީ ނިޒާމު ގާއިމްކޮށް، ތެލެސީމިއާ ކުދިންނަށް ލޭ ހަދިޔާކުރާނެ މީހުންގެ ގޮތުގައި އެ ސެންޓަރަށް ތައާރަފްކޮށްދޭ މީހުން އަދި އެ މީހުންގެ ލޭގެ ތަފްސީލުތައް ހިމެނޭ ދަފްތަރެއް ގާއިމްނުކޮށް ގިނަ ދުވަސްވަނީ ކީއްވެގެންތޯ ސުވާލުކުރައްވައިފައެވެ.

މީގެ އިތުރުން ލޭ ހޯދުމާއި ދިނުމުގައި މިހާރު ދިމާވާ ދަތިތަކަށް ޒަމާނީ ހައްލެއް ނުގެނެވިގެން އުޅެނީ ކީއްވެގެންތޯ ވެސް އައްސަވާފައިވެއެވެ. 

ލޭ ހޯދުމުގެ މައްސަލަތަކާ ގުޅޭގޮތުން ހެލްތު މިނިސްޓަރާ ސުވާލުކުރެއްވިއިރު، މޯލްޑިވްސް ބްލަޑް ސާވިސްއިން  ވަނީ ލޭ ލިބުން ދަތިވުމުން އާއްމުންގެ އެހީއަށް އެދިފައެވެ.

އެ އިދާރާއިން މިދިޔަ ބުރާސްފަތި ދުވަހު ސޯޝަލް މީޑިއާގައި ކުރި ޕޯސްޓުގައި ބުނީ ހުރިހާ ގްރޫޕެއްގެ ލޭ ވެސް ބޭނުންވާ ކަމަށެވެ. 

ރަސްމީ ދުވަސްތަކުގައި ހެނދުނު 8:00 އިން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ އެވެ.