ދިވެހިރާއްޖޭގައި މަސައްކަތްކުރާ ދިވެހި ނަރުހުން އަލަށް ރަޖިސްޓްރީވުމަށް ކޯސް ނިންމިކަމުގެ ލިޔުން ހުށަހެޅިނަމަވެސް ކޮލިފިކޭޝަން ސެޓްފިކެޓް (ސަނަދު) ހުށަނާޅާނަމަ ދާއިމީގެ ބަދަލުގައި ވަގުތީ ރަޖިސްޓްރޭޝަނެއް ދޭ ގޮތަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ނިންމައިފިއެވެ.

މޯލްޑިވްސް ނާސިން އެންޑް މިޑްވައިފަރީ ކައުންސިލްގެ މި ނިންމުން ހާމަކޮށް އެ ކައުންސިލުން ބުނީ އެ ކައުންސިލުގައި ދިވެހި ނަރުހުން އަލަށް ރަޖިސްޓްރީވުމަށް ކޯސް ނިންމިކަމުގެ ލިއުން ހުށަހަޅަމުންދިޔަނަމަވެސް ކޮލިފިކޭޝަން ސެޓްފިކެޓް ހުށަނާޅާކަން ފާހަގަކުރެވިފައިވާ ކަމަށެވެ. އަދި މިހާރު އަމަލުކުރަމުންދާ އުސޫލުގެ ދަށުން، ކޯސް ނިންމިކަމުގެ ލިޔުމަށް ބިނާކޮށް ދާއިމީ ރަޖިސްޓްރޭޝަނަކާއެކު ޕްރޮވިޝަނަލް ލައިސަންސެއް ދޫކުރި ނަމަވެސް އަންނަ މަހުގެ ފުރަތަމަ ދުވަހުން ފެށިގެން އެ އުޞޫލަށް ބަދަލު ގެނައުމަށް ނިންމާފައިވާކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ބުންޏެވެ.

އެ ކައުންސިލުން ބުނީ އަންނަ މަހުގެ ފުރަތަމަ ދުވަހުން ފެށިގެން ކޯސް ނިންމިކަމުގެ ލިޔުމާއެކު ރަޖިސްޓްރީވުމަށް ހުށަހަޅާ ފަރާތްތަކަށް ދޫކުރެވޭނީ ޕްރޮވިޝަނަލް ރަޖިސްޓްރޭޝަނާއި ޕްރޮވިޝަނަލް ޕްރެކްޓިސިންގ ލައިސަންސްކަމަށެވެ.

މީގެ އިތުރުން، ކޮމްޕިޓެންސީ އިމްތިހާނުން ފާސްވެގެން ލައިސަންސް ހޯދުމަށް ހުށަހަޅާ ނަރުހުންނާއި، އިތުރު ކޮލިފިކޭޝަން ހިމަނަން އެދޭ ނަރުހުންވެސް، ކޮލިފިކޭޝަން ސެޓްފިކެޓް ހުށަހަޅަންޖެހޭނެކަމަށް މޯލްޑިވްސް ނާސިން އެންޑް މިޑްވައިފަރީ ކައުންސިލުން ބުނެއެވެ.

Ad by Hajj Corporation