މާލޭގައި ހުއްދަ ނެތި ހިންގަމުންދިޔަ ދެ ވިޔަފާރިއެއް ބަންދުކޮށް، އެ ތަންތަނުގައި މަސައްކަތް ކުރަމުންދިޔަ 15 ބިދޭސީއަކު ކަމާބެހޭ އިދާރާތަކުގެ ބެލުމުގެ ދަށަށް ގެންގޮސްފިއެވެ.

ފުލުހުން މައުލޫމާތު ދީފައިވާ ގޮތުގައި، މި އޮޕަރޭޝަނަކީ 2026 ޖެނުއަރީ 28 ވަނަ ދުވަހު ދިވެހި ފުލުހުންގެ ޚިދުމަތާއި، މޯލްޑިވްސް އިމިގްރޭޝަން އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓް ގުޅިގެން މާލޭގައި ކުރިއަށް ގެންދިޔަ ޖޮއިންޓް އިންސްޕެކްޝަނެކެވެ. މި އިންސްޕެކްޝަނުގެ ތެރެއިން ބިދޭސީން ދިރިއުޅޭ ދެ ތަނެއް ބަލައި ފާސްކޮށްފައިވެއެވެ.

Ad by Hajj Corporation

ރޮށި ފިހާ ތަނަކާއި ފިހާރައެއް ބަންދުކުރުން

ބަލައި ފާސްކުރި ތަންތަނުގެ ތެރެއިން އެއް ތަނަކީ އެއްވެސް ހުއްދައެއް ނެތި ވިޔަފާރި އުސޫލުން ރޮށި ފިހެ ވިއްކަމުންދިޔަ ތަނެކެވެ. އެކަން ފާހަގަކުރެވުމާއެކު ކަމާބެހޭ އިދާރާތަކުން ވަނީ އެ މަސައްކަތް ހުއްޓުވާފައެވެ. މީގެ އިތުރުން، ދެވަނަ ތަނުގައި ގަވާއިދާ ހިލާފަށް ފިހާރައެއް ހިންގައި، މުދާ ވިއްކަމުންދިޔަކަން ވެސް އިންސްޕެކްޝަން ޓީމަށް ވަނީ ފާހަގަކުރެވިފައެވެ.

މި ދެ ތަނަކީ ވެސް ގަވާއިދާ ހިލާފަށް ހިންގަމުންދިޔަ ތަންތަން ކަމަށްވާތީ، މިނިސްޓްރީ އޮފް އިކޮނޮމިކް ޑިވެލޮޕްމަންޓުން މިހާރު ވަނީ އެ ދެ ތަން ބަންދުކޮށްފައެވެ.

15 ބިދޭސީއަކު އިމިގްރޭޝަންގެ ބެލުމުގެ ދަށަށް

މި އިންސްޕެކްޝަންތަކަށްފަހު، އެ ތަންތަނުގައި ތިބި ޖުމްލަ 15 ބިދޭސީ ފިރިހެނުން ވަނީ މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފައެވެ. މި ބިދޭސީންނަކީ ރާއްޖޭގައި އުޅުމާއި މަސައްކަތް ކުރުމުގެ ގަވާއިދުތަކާ ހިލާފަށް އުޅެމުންދިޔަ ބައެއް ކަމަށް ބެލެވެއެވެ.

ސަރުކާރުގެ ކަމާބެހޭ އިދާރާތަކުން ދަނީ ގަވާއިދާ ހިލާފަށް ވިޔަފާރިކޮށް މަސައްކަތް ކުރާ ބިދޭސީން ހޯދުމަށް މާލެ ސަރަހައްދުގައި ސިލްސިލާ އިންސްޕެކްޝަންތަކެއް ކުރިއަށް ގެންދަމުންނެވެ.