ތ. ވިލުފުށީގައި ޑޮމެސްޓިކް އެއާޕޯޓެއް އެޅުމަށް ކުރާ މަސައްކަތުގެ ދަށުން އެކަމަށް ބޭނުންވާ ބިންހިއްކުމުގެ މަސައްކަތުގެ 80 އިންސައްތަ ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ބުނެފިއެވެ.

ވިލުފުށީ އެއާޕޯޓު ތަރައްޤީކުރުމުގެ މަސައްކަތްކުރަން އެމްއޭސީއެލްއަށް ހަވާލުކޮށްފައިވަނީ މިދިޔަ އަހަރު ސެޕްޓެންބަރު މަހުއެވެ.

މިމަސައަކަތް ހަވާލުކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިލުއްފުއްޓަށް ކުރެއްވި ދަތުރުފުޅުގެ ތެރެއިން ބޭއްވި ރަސްމިއްޔާތެއްގައެވެ.

Ad by Hajj Corporation

އެމްއޭސީއެލްއިން މައުލޫމާތު ދޭ ގޮތުގައި، އެއާޕޯޓު ތަރައްޤީކުރުމަށް ބޭނުންވާ ބިންހިއްކުމުގެ މަސައްކަތް ފަށައި މިހާރު ބޮޑުބައެއް ވަނީ ނިންމާފައެވެ.

މިމަޝްރުޢޫގެ މަސައްކަތުގެ ދަށުން ބިން ހިއްކުމުގެ 80 އިންސައްތަ ނިމިފައިވާއިރު، ހިއްކުމަށް ކަނޑައެޅިފައިވާ 81 ހެކްޓަރުގެ ތެރެއިން މިއީ 61 ހެކްޓަރުގެ ބިމެވެ.

ވިލުފުށީގައި ތަރައްޤީކުރާ އެއާޕޯޓު ހިންގާނީވެސް އެމްއޭސީއެލްއިންނެވެ.

މި އެއާޕޯޓަކީ 1800 މީޓަރުގެ ރަންވޭއަކާއެކު ތަރައްޤީކުރާ އެއާޕޯޓެކެވެ. މިމަޝްރޫޢުގެ މަސައްކަތް 2 އަހަރާއި 6 މަސް ދުވަހުގެ ތެރޭގައި ނިންމަން ޖެހޭއިރު މަޝްރޫޢުގެ ދަށުން ރަންވޭއާއި ޓަމިނަލް ބިލްޑިން ފަޔަރ ބިލްޑިން އަދި އެނޫންވެސް އެއާޕޯޓަކަށް ބޭނުންވާ ހުރިހާ ވަސީލަތެއް ފުރިހަމަކޮށް ޤާއިމްކުރާނެއެވެ.

ވިލުފުށީގެ އެއާޕޯޓު މަސައްކަތް ކުރުމަށް ބޭނުންވާ ބިން ހިއްކުމުގެ ޢަމަލީ މަސައްކަތް ފަށާފައިވަނީ، މިދިޔަ ނޮވެންބަރު މަހު 14 ވަނަ ދުވަހުއެވެ. މިމަސައްކަތް ކުރަނީ ކެޕޭސީޓީގައި 11،300 ކިއުބިކް މީޓަރ ހުރި ފިލިއްޕޯ ބްރޫނެލްޝީ ނަމަކަށް ކިޔާ ޑްރެޖަރެއް ބޭނުންކޮށްގެން ކަމަށް އެމްއޭސީއެލްއިން ވަނީ ހާމަކޮށްފައެވެ.

ވިލުފުށީ އެއާޕޯޓު ތަރައްޤީކުރުމުގެ މަސައްކަތް އިފްތިތާޙްކޮށްދެއްވައި، ބިން ހިއްކުމުގެ މަޝްރޫޢުގެ މަސައްކަތް ފަށްޓަވައި ދެއްވުމަށް ފަހު އެރަށުގެ ރައްޔިތުންނާއި ބައްދަލުކުރައްވާ ރައީސުލްޖުމްހޫރިއްޔާ ވަނީ މިމަސައްކަތް މިދައުރު ތެރޭ ތެރޭގައި ނިންމަވައިދެއްވާނެ ކަމަށް ވިދާޅުވެފައެވެ.