ނ. ވިހަފަރުގައި ޑޮމެސްޓިކް އެއާޕޯޓެއް އެޅުމަށް ބޭނުންވާ ބިން ހިއްކުމުގެ އަމަލީ މަސައްކަތް މިއަދު ފަށައިފިއެވެ.

މި މަޝްރޫއުގެ އަމަލީ މަސައްކަތް ފެށީ ނ. އަތޮޅުގައި ތަރައްގީކުރާ "އައިލާ މޯލްޑިވްސް" ގެ އަމަލީ މަސައްކަތް ރަސްމީކޮށް ފައްޓަވައިދެއްވުމަށް ރައީސް ޑރ. މުހައްމަދު މުއިއްޒު އެ އަތޮޅަށް ކުރެއްވި ދަތުރުފުޅުގެ ތެރެއިންނެވެ.

Ad by Hajj Corporation

އެ ރަށުގައި އެއާޕޯޓު އެޅުމަށްޓަކައި ބިން ހިއްކުމުގެ އަމަލީ މަސައްކަތް ފައްޓަވައި ދެއްވީ އިކޮނޮމިކް މިނިސްޓަރު މުހައްމަދު ސައީދު އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އިބްރާހިމް ޝަރީފް މުހައްމަދެވެ.

މި ރަސްމިއްޔާތުގައި ރައީސް ޑރ. މުއިއްޒު ބައިވެރިވެވަޑައިގެންނެވިއިރު، އެމަނިކުފާނުގެ އަރިހުގައި ކޮންސްޓްރަކްޝަން، ހައުސިން، އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބާއި އޯޝަން ރިސޯސަސް މިނިސްޓަރު އަހުމަދު ޝިޔާމުގެ އިތުރުން ސަރުކާރުގެ އިސްވެރިން ބައިވެރިވަޑައިގެންނެވިއެވެ.

ނ. އަތޮޅުގެ ހުޅަނގު ބިތުގައި އެއާޕޯޓެއް ތަރައްގީކުރުމަށް މި ސަރުކާރުން ކުރިޔަށް ގެންދާ މި މަޝްރޫއުގެ ދަށުން 1.6 މީޓަރުގެ އުސްމިނުގައި 42 ހެކްޓަރުގެ ބިން ހިއްކަން ވަނީ ހަމަޖެހިފައެވެ.

އެ އަތޮޅުގައި މިވަގުތު އޮންނަނީ ހަމައެކަނި ނ.މާފަރު އެއާޕޯޓެވެ. 

22 ޖުލައި 2025ގައި ހޮޅުދޫ އަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ގާތްގަނޑަކަށް 30 މިނެޓުން ދަތުރުކުރެވޭ އެއާޕޯޓްތަކެއް ގާއިމުކުރުމަކީ ސަރުކާރުގެ އަމާޒު ކަމަށެވެ. މީގެ އިތުރުން ރައީސް ވަނީ މި އެއާޕޯޓް އެޅުމުން އަތޮޅުގެ ހުރިހާ ރަށްތަކަށާއި ރިސޯޓުތަކަށް މީގެ ފައިދާ ކުރާނެ ކަމަށްވިދާޅުވެފައެވެ.

މި މަޝްރޫއަކީ ނ. އަތޮޅުގައި ޓޫރިޒަމް ކުރިއެރުވުމަށް ފައިދާ ކުރާނެ މަޝްރޫއެއް ގޮތުގައި ފާހަގަކުރައްވާފައެވެ. އަދި މި މަޝްރޫއު ދޮޅު އަހަރެއްގެ ތެރޭގައި ނިމޭނެ ކަމެއް ކަން ވެސް ރައީސް ވަނީ ފާހަގަކުރައްވާފައެވެ.

ސަރުކާރުގެ ހުރިހާ އަމާޒެއް ވެސް ހުރީ ރައްޔިތުންނަށް ކަންކަން ފުރިހަމަކޮށްދިނުމަށް ކަން ވެސް ރައީސް ފާހަގަކުރެއްވިއެވެ.

މީގެ އިތުރުން ރައީސް ވަނީ ދިވެހި ރާއްޖެއަކީ އެއްވެސް ބަޔަކަށް އަޅުދާސްތުވާން ނުޖެހި ދިވެހި ރާއްޖޭގެ ފަހުރުވެރިކަން މިނިވަން މުސްތަގިއްލު ޤައުމެއް ގޮތުގައި ދަމަހައްޓާ އަދި އަމިއްލަ ވަންތަކަން އަބަދުމެ ޔަގީން ކަމާއެކު އިހްސާސްވާ ފަހުރުވެރި ދިވެހި ޤައުމެއްގެ ގޮތުގައި ކުރިއަށް ގެންދިޔުމެވެ.