ޤުރުއާނާއި ހަދީޘުން ސާބިތުވާ ގޮތުގައި ސިޙުރަކީ ކުފުރެކެވެ. ބޮޑުވެގެންވާ ހަތް ފާފައިގެ ތެރެއިންވާ ފާފައެކެވެ. ސިޙުރު ހަދާމީހާ އިސްލާމް ދީނުގެ މިއްލަތުން ބޭރުވެގެންދެއެވެ. ސިޙުރުވެރިޔަކަށް ސިޙުރުން ކުޑަމިންވަރެއްވެސް ﷲ ތަޢާލާއަށް ޝިރުކު ކުރުމަކާއިނުލާ ނެހެދޭނެއެވެ. ސިޙުރުގައި އަޅާ ފުރަތަމަ ފިޔަވަޅަކީ ކުފުރުގައި އަޅާ ފުރަތަމަ ފިޔަވަޅެވެ. ސިޙުރަކީ އޭގައި އެއްވެސް މަންފާއެއް ނުވާކަމެއްކަމުގައި ﷲ ތަޢާލާ ކީރިތި ޤުރްއާނުގައި ބަޔާން ކުރައްވާފައިވެއެވެ. އެ އިލާހު ވަޙީ ކުރައްވާފައިވެއެވެ.

وَيَتَعَلَّمُونَ مَا يَضُرُّهُمْ وَلَا يَنفَعُهُمْ

Ad by Hajj Corporation

މާނައީ: “އެއުރެން އެ އުނގެނެނީ އެއުރެންނަށް ގެއްލުންދޭ، އަދި އެއުރެންނަށް މަންފާއެއް ނުކުރާ ކަންތަކެވެ.”

އަދިވެސް ﷲ ތަޢާލާ ވަޙީ ކުރައްވާފައިވެއެވެ.

وَلَا يُفْلِحُ السَّاحِرُ حَيْثُ أَتَىٰ

މާނައީ: “އަދި ސިޙުރުވެރިޔާ ކޮންމެ އެއްޗެއް ގެނައި ކަމުގައި ވިޔަސް އޭނާއަށް ކާމިޔާބެއް ނުލިބޭނެއެވެ.”

ސިޙުރު ހަދާމީހާއަކީ ﷲ ތަޢާލާއަށް ކާފަރުވެގެންވާ މީހެކެވެ. ﷲ ތަޢާލާ ވަޙީކުރައްވާފައިވެއެވެ.

وَمَا كَفَرَ سُلَيْمَانُ وَلَـٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ

މާނައީ : “ސުލައިމާންގެފާނު ކާފަރުވެވަޑައެއް ނުގަނެއެވެ. އެހެނެއްކަމަކު، އެ ޝައިޠާނުން ކާފަރު ވޫއެވެ. އެއުރެން މީސްތަކުންނަށް ސިޙުރު އުނގަންނައި ދިނުމުންނެވެ. އަދި ބާބިލް ގައިވާ ހާރޫތު އާއި، މާރޫތު އާއި ދެ މަލާއިކަތުންގެ މައްޗަށް ބާވައިލެއްވި ތަކެއްޗާވެސް (އެއުރެން ތަބަޢަ ވޫއެވެ.) ތިމަންމެން ވާކަން ކަށަވަރީ (އީމާންކަން ކަންހުރި މިންވަރެއް ބެއްލެވުމުގެ ގޮތުން މެދުވެރި ކުރައްވާފައިވާ) އިމްތިޙާނެއް އެއް ކަމުގައޭ، ފަހެ (އެ ދަސްކޮށްގެން) ކާފަރު ނުވާށޭ ވިދާޅުވެ (ނަޞީޙައް ދެއްވުމަށް ފަހުގައި) މެނުވީ، އެއްވެސް މީހަކަށް އެ ދެ މަލާއިކަތުން ން އުނގަންނަވައެއް ނުދެއްވަތެވެ.”

ޢިލްމުވެރިން ވިދާޅުވާ ގޮތުގައި، ސިޙުރުވެރިޔާގެ ޙުކުމަކީ ޤަތުލު ކުރުމެވެ. އަދި ސިޙުރު ހަދައިގެން އޭނާހޯދާ ފައިސާއަކީ ނަޖިސްވެގެންވާ ޙަރާމް މުދަލެވެ. ޖާހިލުންނާއި އަނިޔާވެރިންނާއި އީމާންކަން ބަލިކަށިމީހުން ސިޙުރުވެރިން ގާތަށް ދަނީ އެމީހުން ބޭނުންވާ މީހަކަށް ގޯނާއެއް ކުރުމަށް ނުވަތަ މީހުންގެ ކިބައިން ބަދަލު ހިފުމަށްޓަކައެވެ. އަދި ބައެއްމީހުނަށް ސިޙުރު ޖެހުމުން ސިޙުރުން ސިޙުރު ބާޠިލް ކުރުމަށްވެސް ސިޙުރުވެރިން ގާތަށް ދެއެވެ. އެހެން ނަމަވެސް ހަނދާކުރަންޖެހޭ ކަމަކީ ރައްކާތެރި ކަމަކީ ހަމައެކަނި ﷲ ތަޢާލާއަށް އެކަނި ދެވޭނެ ކަމެއް ކަމެވެ. ސިޙުރު ޖެހުމުން އަޅުގަނޑުމެން ޝިފާހޯދަން ޖެހެނީ ﷲ ތަޢާލާ ޝަރުޢުކުރެއްވި ޒިކުރުތަކާއި އެއިލާހުގެ ކަލާމްފުޅު ކީތިރި ޤުރްއާން އިންނެވެ.

އަދި ކާހިނުންނާއި އަތްބަލާމީހުންނަކީ ﷲ ތަޢާލާ އަށް ކާފަރުވެގެންވާ ބަޔެކެވެ. އެމީހުން ޣައިބުގައުވާ ކަންތައް އެނގޭކަމުގައި ދަޢުވާ ކުރިކަމުގައި ވިޔަސް ﷲ ފިޔަވައި އެހެން އެއްވެސް ފަރާތަކަށް ޣައިބުގައިވާ އެއްވެސް ކަމެއް އެނގިގެން ނުވެއެވެ. ﷲ ތަޢާލާ ވަޙިކުރައްވާފއިވެއެވެ.

وَعِندَهُ مَفَاتِحُ الْغَيْبِ لَا يَعْلَمُهَا إِلَّا هُوَ

މާނައީ: “އަދި ޣައިބުގެ ތަޅުދަނޑިތައްވަނީ، އެއިލާހުގެ ޙަޟުރަތުގައެވެ. އެއިލާހު މެނުވީ، އެކަންތައްތައް ދެނެވޮޑިގެންނުވެތެވެ.”

ދިވެހިރާއްޖޭގެ ދިވެހިބޭސްކުރުމާއި ފަންޑިތަ ހެދުމާއި ޚިތާންކުރުމާއި އަދި ފޫޅުމާކަންކުރުމާބެހޭ ޤާނޫނުގައި ބަޔާންކޮށްފައިވަނީ، ފަންޑިތަ ހެދުން ފަދަ ކަމެއް ކުރަންވާނީ މިނިސްޓްރީ އޮފް ހެލްތަށް ލިޔެ ހުއްދަ ހޯދައިގެން ކަމަށެވެ. ނަމަވެސް، މިހާރަކަށް އައިސް ހުއްދަ ހޯދުމެއްނެތި ފަންޑިތަ ސިހުރު ހާހޫރަ ހަދަމުންދާ ބަޔަކު މުޖުތަޢުގައި އުޅެމުންދާކަމުގެ މަޢުލޫމާތު މިނިސްޓްރީ އޮފް އިސްލާމިކް އެފެއާޒަށް ލިބެމުންދާކަން އެ މިނިސްޓްރީން ފާހަގަކުރެއެވެ.

މީގެ އިތުރުން ޚަބަރުފަތުރާ ބައެއް ވަސީލަތްތަކުންވެސް އިސްލާމްދީނުގައި ޙަރާމްކުރައްވާފައިވާ ބޮޑު ފާފައިގެ ތެރޭގައި ހިމެނޭ ސިހުރު ހެދުމާބެހޭގޮތުން ޕްރޮގާމުތައް ފޮނުވަމުންދާކަމުގެ ކަންބޮޑުވުންވެސް އެ މިނިސްޓްރީގެ އެބަ އޮތެވެ. ފަންޑިތަ ސިހުރު ހާހޫރަ ހެދުމަކީ އިސްލާމީ މުޖުތަމަޢެއްގައި ހުއްދަ ކަމެއްނޫނެވެ. އެހެންނަމަވެސް، އީމާންކަން ބަލިކަށިވުމުގެ ސަބަބުން، ތިމާގެ ކިބައިގައި ނެތް ކުޅަދާނަކަމެއް ހޯދައިގަތުމުގެ މަޤްޞަދުގައި ބައެއް މީހުން ސިހުރު ހާހޫރައިގެ ބޭނުން ކުރެއެވެ. މިކަމުގެ ނުރައްކާތެރިކަމަކީ، މާތް اللهُ އަށް އުރެދި، ސިހުރު ހަދާ މީހާ ޝައިޠާނާގެ އަމުރުތަކަށް ކިޔަމަންވާން ޖެހުމެވެ.

ފަނާކުރަނިވި ބޮޑެތި ފާފަތަކުގެ ތެރޭގައި ސިހުރު ހިމަނުއްވާފައިވުމުން އެކަމުގެ ނުބައިކަމާއި އެކަމުގެ ސުންޕާކަން އެނގެއެވެ. މާތް اللهُ އަޅުގަނޑުމެންނަށް ޙަރާމް ކުރައްވާފައިވާ އެއްވެސް ކަމެއްގައި ޝިފާއެއް ލައްވާފައެއް ނުވާނެއެވެ. އެހެންކަމުން އަޅުގަނޑުމެންގެ މައްޗަށް އޮތީ ކަންކަމަށް އެދިގެން الله ގެ ޙަޟްރަތުގައި ދެންނެވުމެވެ. ހުރިހާ ކަމެއް މިންވަރު ކުރައްވަނީ މާތް اللهُ ކަން ޤަބޫލުކުރުމެވެ.

އެެހެންކަމުން މިފަދަ ކަންކަމާމެދު ވިސްނާ ފިކުރުކޮށް، މާތް ﷲގެ ޝަރީޢަތުގައި ސިހުރު ހާހޫރަ ހެދުން މަނާކޮށްފައިވާކަން ގަބޫލުކޮށް، އެކަމަށް ނުކިޔަމަންތެރިވާ ބަޔަކުކަމުގައި ނުވުމަށް، މިފަދަން ކަންކަން ކުރާ އެންމެހައި ފަރާތްތަކަށް މިނިސްޓްރީން ވަނީ ހަނދާންކޮށްދީފައެވެ. އަދި މިފަދަ ފާފަވެރިކަމަކަށް އަރައި ނުގަތުމަށް ދިވެހި ލޮބުވެތި ރައްޔިތުންގެ ކިބައިން އިޙުތިރާމާއެކު އެދިފައިވެއެވެ. މާތް اللهُ އަޅަމެން އެންމެން ސިހުރުގެ ނުބައިކަމުންނާއި އެކަން ކުރާ މީހުންގެ ކިބައިންނާއި އެންމެހައި ނުބައިކަންކަމުން ސަލާމަތްކުރައްވައި ރައްކާތެރިކުރައްވާށިއެވެ! އާމީން!