ސްކޫލްތަކުގައި ކުރިއަށްގެންދިއުމަށް ހަމަޖެހިފައިވާ ތަރުބަވީ ޚާއްސަ ޕްރޮގްރާމް "ބިންގާ" ކުރިއަށް ގެންދިއުމަށްޓަކައި ސްކޫލްތަކުން ކުރަންޖެހޭ މަސައްކަތް ކުރުމަށް ތަޢުލީމާބެހޭ ވުޒާރާއިން އަންގައިފިއެވެ.

މި ޕްރޮގްރާމަކީ ވަކި ތީމްތަކަކަށް ބަހާލައިގެން މުޅި އަހަރު ދުވަހަށް ދެމިގެންދާގޮތަށް ކުރިއަށްގެންދިއުމަށް ހަމަޖެހިފައިވާ ޕްރޮގްރާމެއް ކަމަށް، ތައުލީމާބެހޭ ވުޒާރާއިން ސްކޫލްތަކަށް ފޮނުވާފައިވާ ސަރކިއުލަރ އެއްގައި ބުނެފައިވެއެވެ. ތަރުބަވީ ޚާއްސަ ޕްރޮގްރާމް "ބިންގާ"އަކީ އަޚްލާޤީ ރީތި ސިފަތަކާއި އާދަތަކަށް ދަރިވަރުން އަހުލުވެރިކުރުމުގެ މަޤްޞަދުގައި ސްކޫލްތަކާއި ބެލެނިވެރިންނާއި މުޅި މުޖުތަމަޢުގެ ބައިވެރިވުމާއެކު ކުރިއަށް ގެންދިޔުމަށް ހަމަޖެހިފައިވާ ޕްރޮގްރާމެކެވެ.

ތަޢުލީމާބެހޭ ވުޒާރާއިން ބުނިގޮތުގައި މި ޕްރޮގްރާމުގެ ހަރަކާތްތައް ކުރިއަށް ގެންދިޔުމަށް ހަމަޖެހިފައިވަނީ ކޮންމެ މަހަކަށް ހާއްސަކޮށް ކަނޑައަޅާ ތީމެއްގެ މައްޗަށެވެ. މި ޕްރޮގްރާމް ފެށުމަށް ހަމަޖެހިފައިވަނީ "ޝުކުރުވެރިވުން" މި ތީމްއާއެކުގައެވެ.

އެއަށްފަހު ކޮންމެ މަހެއް ފެށުމުގެކުރިން އެމަހަކަށް ކަނޑައަޅާފައިވާ ތީމް، ސްކޫލްތަކަށް ތަޢުލީމާބެހޭ ވުޒާރާއިން އަންގާގޮތަށް ވަނީ ހަމަޖައްސާފައެވެ.

Ad by Hajj Corporation

މި ޕްރޮގްރާމް ވިލަރެސް ކުރުމަށް ޚާއްސަ ކޮމިޓީއެއް ތަޢުލީމާބެހޭ ވުޒާރާއިން ކަނޑައަޅާފައިވާއިރު އެ ކޮމިޓީން ތީމް ކަނޑައެޅުމާއި ކުރިއަށްގެންދާނެ ހަރަކާތްތައް ސްކޫލްތަކަށް ހިއްސާކޮށް ޕްރޮގްރާމް ކުރިއަށްގެންދިއުމަށް އެހީތެރިވުމުގެ އިތުރުން ޕްރޮގްރާމް ވަޒަންކުރުމުގެ މަސައްކަތް ސްކޫލްތަކާ ގުޅިގެން ކުރާނެއެވެ.

މި ޕްރޮގްރާމްގެ ތެރެއިން ދަރިވަރުން ދީނީ ވާޖިބުތަކުގެ އިތުރުން އަޚްލާޤީ ރިވެތި ސިފަތަކަށާއި އާދަތަކަށް އަހުލުވެރިކުރުމަށް އަމާޒުކޮށްގެން ކޮންމެ ސްކޫލަކުންވެސް ޚާއްސަ ހަރަކާތްތަކެއް ކުރިއަށްގެންދާނެކަމަށް ތަޢުލީމާބެހޭ ވުޒާރާއިން ބުނެއެވެ. އޭގެތެރޭގައި އިޙްތިރާމްކުރުމާއި ޒިންމާނެގުމާއި ސާފުތާހިރުކަމާއި އަޅާލުމާއި އޯގާތެރިކަން އިސްކުރުންފަދަ ރިވެތި ސިފަތަކާއި އާދަތައް ދަރިވަރުންގެ ކިބައިގައި އަށަގަންނެވުން ހިމެނެއެވެ.

މި ޕްރޮގްރާމްގެ ތެރެއިން ފަރުޟު ފަސް ނަމާދުކުރުމަށް ބާރު އެޅުމުގެ ގޮތުން ކޮންމެ މަހަކަށް ކަނޑައަޅާ ތީމްއާއި ނަމާދުގެ މާތް އަޅުކަމާގުޅިގެންދާ ގޮތް ދަރިވަރުންނަށް އަންގާދޭންޖެހެއެވެ. "ބިންގާ" ޕްރޮގްރާމް ސްކޫލްތަކުގައި ކުރިއަށްގެންދިޔުމުގައި އެންމެ އިސްދައުރެއް އަދާކުރާނީ ޕްރިންސިޕަލް ނުވަތަ އެވަގުތެއްގައި އެ ސްކޫލެއް ހިންގުމާ ހަވާލުވެހުންނަ އެންމެ އިސް ފަރާތެވެ.

މި ޕްރޮގްރާމްގެ ދަށުން ސްކޫލްތަކުން ކުރިއަށްގެންދާ ހަރަކާތްތަކުގެ އިތުރަށް ކޮންމެ މަހަކަށް ކަނޑައަޅާ ތީމް ތަޢާރަފްކުރުމަށް ކޮންމެ މަހަކު ޚާއްސަ އެސެމްބްލީއެއް ބޭއްވުމާއި ތީމްއާ ގުޅޭގޮތުން ވާހަކަދެއްކުމުގެ ފުރުޞަތު ދަރިވަރުންނަށް ފަހިކޮށްދޭންޖެހެއެވެ. އަދި ރަށު ފެންވަރުގައި ޕެނަލް ޑިސްކަޝަނެއް ފަދަ ބޮޑު ހަރަކާތެއް ކުރިއަށްގެންދިޔުމާއި އެކި މާއްދާތަކުގެ ތެރެއިން ތީމްއާ ގުޅޭ މަޢުލޫމާތުތާއި ހުނަރުތައް ދަސްކޮށްދޭންވެސް ޖެހެއެވެ.

މި ކަންކަމުގެ އިތުރުންވެސް ސްކޫލުން ރާވާ އިންތިޒާމްކުރާ ކޮންމެ ހަރަކާތަކީ ދަރިވަރުންގެ ކިބައިގައި ރިވެތި އަދަބާއި އާދަަތައް އަށަގެންނެވުމަށް ބާރުލިބިދޭ ގޮތަށް ކުރިއަށްގެންދާ ހަރަކާތަކަށްވެސް ހަދަންޖެހެއެވެ. އަދި މުޖުތަމަޢުގައި އުޅޭއިރު ކުރެވޭނެ ކަންތައްތައް ބެލެނިވެރިންނާއި ދަރިވަރުންނަށް އަންގައިދިނުމާއި ކޮންމެ މަހަކަށް ކަނޑައަޅާ ތީމްއާއި ގުޅޭގޮތުން ސްކޫލުން ހިންގާ ހަރަކާތްތައް އެ ސްކޫލެއްގެ މީސްމީޑިއާ މަންސަތަކުގައި ހިއްސާ ކުރުމަށްވެސް ތަޢުލީމީ ވުޒާރާގެ ސަކިއުލާގައިވެއެވެ.