ކ. ގުޅީފަޅު ކައިރިން ދަތުރުކުރަމުންދަނިކޮށް ފަތުރުވެރިން ގޮވައިގެން ދަތުރުކުރި ލޯންޗެއް ބަންޑުންޖަހާލައި، އޭގައި ތިބި މީހުން އެމްއެންޑީއެފް ކޯސްޓްގާޑުން މިއަދު ސަލާމަތްކޮށްފިއެވެ.

މި ހާދިސާ ހިނގާފައިވަނީ "ބުލެޓް ސްޕީޑް" ނަމަކަށް ކިޔާ ލޯންޗެއް ގުޅީފަޅު ކައިރިން ދަތުރުކުރަމުން ދަނިކޮށެވެ. މި ލޯންޗު ބަންޑުންޖަހާލި ވަގުތު އޭގައި 9 ފަތުރުވެރިންނާއި، 2 ފަޅުވެރިންގެ އިތުރުން ލޯންޗުގެ ކެޕްޓަން ހުއްޓެވެ.

Ad by Hajj Corporation

ލޯންޗު ބަންޑުންޖަހާލުމުގެ ސަބަބުން ކަނޑުވި މީހުން ފުރަތަމަ ނަގާފައިވަނީ އެ ސަރަހައްދުން ދަތުރުކުރަމުންދިޔަ "ބީޗް ސްޓޯން" ނަމަކަށް ކިޔާ ލޯންޗަކަށެވެ. އެއަށްފަހު، ހާދިސާގެ ރިޕޯޓް ލިބުމާއެކު އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންގެ ހާބަރކްރާފްޓް ވަނީ އެ ސަރަހައްދަށް ގޮސް އެހީތެރިކަން ފޯރުކޮށްދީފައެވެ.

ކޯސްޓްގާޑުން ވަނީ ކަނޑުވި އެންމެން އެމްއެންޑީއެފްގެ އުޅަނދަށް ބަދަލުކޮށް، މިއަދު ހެނދުނު 09:40 ހާއިރު ސަލާމަތްތެރިކަމާއެކު މާލެއަށް ގެނެސްދީފައެވެ.