ފްރާންސްގެ ކްލަބް މާސޭގެ ކޯޗުގެ މަގާމުން އިޓަލީގެ ރޮބާޓޯ ޑި ޒާބީ ވަކިވެއްޖެއެވެ. މަޝްހޫރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ ރިޕޯޓްކޮށްފައިވާ ގޮތުގައި، ޑި ޒާބީ މަގާމުން ވަކިވީ ދެ ފަރާތް އެއްބަސްވެގެންނެވެ.

މާސޭއިން މި ނިންމުން ނިންމާފައިވަނީ ލީގު ވަންގެ ހަތަރުވަނަ މަގާމުގައި އެ ޓީމު މިވަގުތު އޮތް ނަމަވެސް، އެއްވަނައިގައި އޮތް ޕީއެސްޖީއަށްވުރެ 12 ޕޮއިންޓް ފަހަތުގައި އޮތުމުންނެވެ. މީގެ އިތުރުން ދާދި ފަހުން އެ ޓީމު ވަނީ ޗެމްޕިއަންސް ލީގުންވެސް ކަޓާފައެވެ.

Ad by Hajj Corporation

މި ސީޒަނުގައި ޑި ޒާބީގެ އިރުޝާދުގެ ދަށުން މާސޭއިން ކުޅުނު ލީގު 22 މެޗުގެ ތެރެއިން މޮޅުވެފައިވަނީ 11 މެޗުންނެވެ. އަދި 6 މެޗު އެއްވަރުވެ، 5 މެޗުން ވަނީ ބަލިވެފައެވެ. މި މެޗުތަކުގައި އެ ޓީމުން 34 ގޯލު ޖަހާފައިވާއިރު، ބައިކޮޅަށް ވަދެފައިވަނީ 22 ގޯލެވެ.

ތަފާސްހިސާބުތަކަށް ބަލާއިރު، މާސޭއިން ކޮންމެ މެޗެއްގައި އެވްރެޖްކޮށް 1.55 ގޯލު ޖަހާފައިވާއިރު، ބައިކޮޅަށް ވަންނަނީ އެވްރެޖްކޮށް 1.0 ގޯލެވެ. މިހާތަނަށް އެ ޓީމަށް ލިބިފައިވަނީ ޖުމްލަ 39 ޕޮއިންޓެވެ.

ޑި ޒާބީ ވަކިވުމާ ގުޅިގެން، މާސޭއިން މިހާރު އަންނަނީ ޓީމަށް އާ ކޯޗެއް ހޯދުމުގެ މަސައްކަތް ކުރަމުންނެވެ. ޕްރިމިއާ ލީގުގެ ބްރައިޓަންގައި ދެއްކި މޮޅު ކުޅުމާއެކު ގިނަ ބައެއްގެ ސަމާލުކަން ހޯދި ޑި ޒާބީ މާސޭއާ ގުޅުނީ މި ސީޒަން ފެށުމުގެ ކުރިންނެވެ.