ފަރުމަސް އެކްސްޕޯޓުކުރާ ފަރާތްތަކަށް ކެޗް ސެޓުފިކެޓު ދޫކުރަން ފަށައިފިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މައުލޫމާތުދިން ގޮތުގައި ގާނޫނާއި ހިލާފަށް، ރިޕޯޓުކުރުމެއް، އަދި ބެލެހެއްޓުމެއް ނެތި (އައިޔޫޔޫ)ކުރާ މަސްވެރިކަން ހުއްޓުވުމުގެ ގޮތުން، އެ ވުޒާރާއިން ކެޗް ސެޓުފިކެޓު ދޫކުރަން ވަނީ ފަށާފައެވެ.

މިއީ ރާއްޖޭގައި ކުރާ މަހުގެ ވިޔަފާރިއާއި، މަހުގެ އުފެއްދުންތައް ހަރުދަނާ ނިޒާމެއްގެ ތެރެއިން ބެލެހެއްޓިގެން ތައްޔާރުކޮށްފައިވާ އުފެއްދުމެއްކަން ކަށަވަރުކޮށްދޭނެ ސެޓުފިކެޓެއްކަމަށް އެ ވުޒާރާއިން މައުލޫމާތުދީފައިވެއެވެ. އަދި އެ ނިޒާމުގެ ތެރެއިން އެކްސްޕޯޓުކުރާ ކޮންމެ ފަރުމަހުގެ ޝިޕްމަންތަކާއެކު މި ސެޓުފިކެޓު އޮތުން ލާޒިމުކުރެވޭނެކަމަށްވެސް އެ ވުޒާރާއިން މައުލޫމާތުދީފައިވެއެވެ.

އަދި މީގެ ސަބަބުން، މަސް ބޭނި އުޅަނދާއި ތާރީހާއި، މަސް ޕްރޮސެސްކުރި ފަރާތުގެ މައުލޫމާތާއި އެ މަސް ކަޑައްތުކޮށްފައިވާ މަރުހަލާތަށް ދެނެގަނެވިގެންދާނެކަމަށް މަސްވެރިކަމާ ބެހޭ ވުޒާރާއިން ބުނެއެވެ.