މިހިނގާ ރޯދަ މަސް ނިމުމުގެ ކުރިން ސަރުކާރުން ޓެކްސީލައިންގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ދަތުރުފަތުރާއި، މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ސަރުކާރުން ޓެކްސީލައިންގެ ޚިދުމަތް ފެށުމަށް ހަވާލުކޮށްފައި ވަނީ އެމްޓީސީސީއާއެވެ.

Ad by Hajj Corporation

ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައިދަތުރުފަތުރާއި، މަދަނީ އުދުހުންތަކާއި ބެހޭ ވަޒީރު ވިދާޅުވީ، މި ޚިދުމަތް ފެށުމަށް ބޭނުންވާ ޓެކްސީތައް މިހާރު ރައްޖެ ގެނައުމުގެ މަގުމަތީގައިވާ ކަމަށެވެ.

މިއީ، ޓެކްސީ ހޯދުމުގައި ދިމާވާ ދަތިތައް ޙައްލު ކޮށްދިނުމަށާއި، ޒަމާނީ ޓެކްސީ ޚިދުމަތެއް ތަޢާރަފްކޮށް މިހާރު ދެމުންދާ ޓެކްސީ ޚިދުމަތުގެ ފެންވަރު ރަނގަޅު ކުރުމަށް ބާރު އެޅުމަށް ސަރުކާރުން ތަޢާރަފް ކުރާ ޚިދުމަތެކެވެ.

ވަޒީރު އަމީން ވިދާޅުވީ، ޓެކްސީ ޚިދުމަތް ފެށުމަށް ތައްޔާރު ކުރާ ޓެކްސީތައް ރާއްޖޭގެ މާޙައުލާއި ގުޅޭނެހެން ބަދަލުތަކެއް ގެނެސް ނިމިފައިވާ ކަމަށެވެ. އަދި ޓެކްސީތަކަށް ބަދަލު ގެނެސްފައިވަނީ ރާއްޖެއަކީ ޖަޒީރާ ރަށްތަކަށް އެކުލެވޭ ޤައުމަކަށްވެފައިވާ ޓެކްސީ އޮޕަރޭޓް ކުރަން ޖެހެނީ މޫދާއި ކައިރި ސަރަހައްދެއްގައި ކަމުން، އިލެކްޓްރޯނިކް ވަސީލަތްތަކަށް އެކަމާއި ގުޅޭ ބަދަލުތައް ގެންނަން ޖެހޭތީ ކަމަށެވެ.

މި ބަދަލުތަކާއެކު 3 މޮޑެލްއެއްގެ ޓެކްސީ ތައްޔާރުކުރެވީ ދެ ބެޗެއްގެ ތެރެއިން ރާއްޖެ ގެނައުމުގެ މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ. މީގެ ތެރެއިން އެއް ބެޗު ގެންނަނީ ތައިލޭންޑުންނެވެ. އެ ޤައުމުން އެ މޮޑެލްގެ 60 ކާރު ގެންނައިރު، ބާކީ ކާރުތައް ގެންނަނީ ޗައިނާއިންނެވެ. ޗައިނާއިން ދެ މޮޑެލްއެއްގެ ކާރު ގެންނާނެ ކަމަށް ވަޒީރު ވިދާޅުވިއެވެ.

މިމަހުގެ 11 ވަނަ ދުވަހު ކާރުތަކުގެ ފުރަތަމަ ބެޗު މާލެ އަންނާނެ ކަމަށް އެމްޓީސީސީއާ ހަވާލާދީ މިނިސްޓަރ ވިދާޅުވިއެވެ.

ދެވަނަ ބެޗު އަންނަނީ ޗައިނާއިން ކަމަށާއި ދެވަނަ ބެޗުގެ އެރައިވަލް ޑޭޓެއް ހުކުރު ދުވަހު ލިބޭނެ ކަމަށް މިނިސްޓަރ ވިދާޅުވިއެވެ.

ވަޒީރު ވަނީ، ސަރުކާރާއި އެމްޓީސީސީން ގުޅިގެން މި ޚިދުމަތް ރޯދަމަސް ނިމުމުގެ ކުރިން ފެށުމަށް މަސައްކަތް ކުރަމުންދާ ކަމަށް ވިދާޅުވެފައެވެ. އަދި ޚިދުމަތް ދޭން ފަށާނީ މަރުޙަލާތަކަކަށް ބަހާލައިގެން ވަކި މިންގަނޑެއްގެ ތެރެއިން ކަމަށް ވިދާޅުވިއެވެ.

ސަރުކާރުން ވަނީ، ޓެކްސީލައިން ޚިދުމަތަށް 150 ކާރު ގެނައުމަށް ނިންމާފައިވާ ކަމަށް ވިދާޅުވެފައެވެ. މި ޚިދުމަތް ފެށުމަށް ތައްޔާރުވަމުން އަންނައިރު، ޚިދުމަތް ދިނުމަށް ޑްރައިވަރުން ނެގުމުގެ މަސައްކަތްވެސް އެމްޓީސީން ވަނީ ކޮށްފައެވެ. ޓެކްސީލައިންގެ ޚިދުމަތް ދިނުމަށްޓަކައި 407 ޑްރައިވަރުން ބޭނުންވެއެވެ. އޭގެ ތެރެއިން 122 ޑްރައިވަރުން ހޯދަނީ، ޕާޓްޓައިމްކޮށް މަސައްކަތް ކުރާ ގޮތަށެވެ. އަދި ބާކީ 285 ޑްރައިވަރުން ހޯދަނީ، ފުލްޓައިމްކޮށް މަސައްކަތް ކުރާ ގޮތަށެވެ.