މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތް މިއަހަތެރޭ ނިންމާލުމަށް މަސައްކަތްކުރަމުންދާކަމަށް ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ދިވެހިބަހާއި ސަޤާފަތާއި ތަރިކައާ ބެހޭ ވުޒާރާގެ މަސައްކަތްތަކުގެ އަދާހަމަ ހިއްސާކުރައްވަމުން، ވަޒީރު ވިދާޅުވީ، އިޤުތިސާދު ސިންތަފާތު ކުރުމާއި، ފަތުރުވެރިކަން ސިންދަފާތުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ޚާއްސަ ސިޔާސަތުގެ ތެރެއިން ތަރިކައިގެ ފަތުރުވެރިކަން ކުރުމަށް އެ ވުޒާރާއިން ގިނަ މަސައްކަތްތަކެއްކުރައްވަމުންގެންދަވާކަމަށެވެ.

އެގޮތުން މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތް މިހާރު ކުރިއަށްދާކަން ފާހަގަކުރައްވާ ވަޒީރު ވިދާޅުވީ، އުއްމީދުކުރައްވަނީ އެ މަޝްރޫޢުގެ މަސައްކަތް މިއަހަރުތެރޭ އެއްކޮށް ނިންމާލުމަށްކަމަށެވެ.

އިކުރިއަށްއޮތް މަހެއްހާ ދުވަސްތެރޭ މަސައްކަތް މާބޮޑަށް ހަލުވިވެގެންދާނެ ކަމަށާއި އުއްމީދުމިކުރަނީ މިއަހަރުތެރޭ ބޮޑުބައެއް ނިންމާލާ ނުވަތަ މުޅި މަސައްކަތްވެސް ނިންމާލުމަށް ކަމަށް ވަޒީރު ވިދާޅުވިއެވެ.

މާލޭގައި ތަރައްޤީކުރާ އިންޓަރެކްޓިވް މިއުޒިއަމަކީ، ރާއްޖޭގެ ތާރިޚުގައިވެސް ބިނާކުރެވޭ ފުރަތަމަ މިފަދަ ދާރުލްއާސާރުކަން ފާހަގަކުރައްވާ ވަޒީރު ވިދާޅުވީ، މި މިއުޒިއަމްގެ ތެރެއިން، ޒަމާނީ ޓެކްނޮލޮޖީގެ އެހީގައި ދިވެހިން މި ކަނޑުގައި 4000އެއްހާ އަހަރު ހޭދަކުރި ގޮތް އެނގިގެންދާނެކަމަށެވެ.

މާލޭގައި ތަރައްޤީކުރާ އިންޓަރެކްޓިވް މިއުޒިއަމަކީ، އުސްގެކޮޅާއި، ކަޅުވަކަރު މިސްކިތް ހުރި ސަރަޙައްދު ހިމެނޭހެން އީޖާދީ ވިސްނުންތަކާ ވަސީލަތްތަކުގެ އެހީގައި ދިވެހި ތާރީޚާއި ތަރިކަ ތަޖުރިބާކުރެވޭނެހެން ތަރައްޤީކުރާ މިއުޒިއަމެކެވެ. މިއީ މިފަދަ ގޮތަކަށް ރާއްޖޭގައި ތަރައްޤީކުރާ ފުރަތަމަ ތަނެވެ.

Ad by Hajj Corporation