ހަނގުރާމައާ ގުޅިގެން ސަލާމަތީ ސަބަބުތަކަށްޓަކައި މެދުކަނޑާލާފައިވާ އިއްތިހާދު އެއާވޭސްގެ ދަތުރުތައް، ސަލާމަތީ ކަންކަން ކަށަވަރުކުރުމަށްފަހު އަލުން ފެށުމަށް އެ އެއާލައިނުން ނިންމައިފިއެވެ.

މި ނިންމުމާއެކު މި މަހުގެ 6 އިން 19 އަށް ދުނިޔޭގެ ވަކި މަންޒިލްތަކަކަށް އެއާލައިނުން ދަތުރުތައް ކުރިއަށް ގެންދާނެއެވެ.

Ad by Hajj Corporation

އިއްތިހާދު އެއާވޭސްއިން ބުނި ގޮތުގައި މި މުއްދަތުގެ ތެރޭގައި އަބޫދާބީއާއި ދުނިޔޭގެ މުހިންމު 25 މަންޒިލަކާ ދެމެދު ދަތުރުތައް ކުރާނެއެވެ. މީގެ ތެރޭގައި ދިވެހިރާއްޖެ، ލަންޑަން، ނިއުޔޯކް، ޕެރިސް އަދި ކޮލަމްބޯ ފަދަ މުހިންމު ސިޓީތައް ހިމެނެއެވެ.

ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވި ތިބި ފަރާތްތަކަށް ލުއިތަކެއް ދިނުމަށްވެސް އެއާލައިނުން ވަނީ ނިންމާފައެވެ.

އެގޮތުން ފެބުރުވަރީ 28 ގެ ކުރިން ޓިކެޓް ނަގާފައިވާ ފަރާތްތަކަށް، އިތުރު ފީއަކާ ނުލައި 2026 މެއި 15 ގެ ކުރިން ދަތުރުގެ ތާރީޚު ބަދަލުކުރުމުގެ ފުރުސަތު ވަނީ ހުޅުވާލާފައެވެ.

މީގެއިތުރުން، ދަތުރު ކެންސަލްކޮށް ރީފަންޑަށް އެދެން ބޭނުންވާ ފަރާތްތަކަށް އޮންލައިން ފޯމު ނުވަތަ ޓްރެވަލް އެޖެންޓުން މެދުވެރިކޮށް އެ ފުރުސަތު ވަނީ ހަމަޖައްސައިދީފައެވެ. އެއާލައިނުން ބުނީ މިވަގުތު ކޯލް ސެންޓަރުތަކަށް ވަރަށް ބޮޑަށް ބާރުބޮޑުވެފައިވާ ކަމަށެވެ.

އެހެންކަމުން، ޚިދުމަތްތައް ހޯދުމުގައި ވީހާވެސް ބޮޑަށް އޮންލައިން ވަސީލަތްތައް ބޭނުންކުރުމަށް އެ އެއާލައިނުން އިލްތިމާސްކުރެއެވެ.