ތިން ކުދިންނާއެކު ނިކަމެތި ހާލުގައި ދިރިއުޅެމުން ދިޔަ މަންމައަކަށް ބޯހިޔާވަހިކަން ފޯރުކޮށްދިނުމަށް މަމްސް އެއިޑް އެންޖީއޯއިން ކުރިއަށް ގެންދިޔަ ހާއްސަ ކެމްޕެއިން ކާމިޔާބުކަމާއެކު ނިންމާލައި، އެ އާއިލާއަށް އާ ގެއެއް ހަވާލުކޮށްފިއެވެ.

"ރަނާގެ އާއިލާއަށް ބޯހިޔާވަހިކަމެއް ހޯދައިދިނުމަށް އެހީތެރިވަމާ" މި ނަމުގައި ކުރިއަށް ގެންދިޔަ މި ކެމްޕެއިނަކީ، ރަނާ (އަސްލު ނަން: ނީނަން) އާއި އޭނާގެ ތިން ކުދިންނަށް ރައްކާތެރި އަދި އަމާން ދިރިއުޅުމެއް ހޯދައިދިނުމަށް ފެށި މަސައްކަތެކެވެ.

Ad by Hajj Corporation

މަމްސް އެއިޑުން ބުނި ގޮތުގައި، މިއަދު އެންމެ ބޮޑު ހިތްހަމަޖެހުމެއް ލިބެނީ އެ އާއިލާއަށް ރައްކާތެރި މާހައުލެއް ހޯދައިދެވި، ފާގަތި މުސްތަޤުބަލަކަށް މަގުފަހިވުމުންނެވެ.

މުޅިން އަލަށް އިމާރާތް ކުރެވުނު މި ޒަމާނީ ގޭގައި، ކުދިންނަށް ހާއްސަ ކޮޓަރިތަކާއި އަރާމު ތަންމަތިތައް ވަނީ ތައްޔާރުކޮށްފައެވެ. މީގެ ކުރިން ދަތި ހާލުގައި އުޅެމުންދިޔަ މި އާއިލާއަށް މިހާރު ވަނީ އަމިއްލަ ވަޒަނެއްގައި ރައްކާތެރިކަމާއެކު ދިރިއުޅުމުގެ ފުރުސަތު ފަހިވެފައެވެ.

މަމްސް އެއިޑުން ފާހަގަކުރި ގޮތުގައި، ނީނަންގެ އާއިލާގެ ދިރިއުޅުމުގެ ހާލަތު ބަދަލުވެގެން ދިޔައީ އާންމުންގެ ފަރާތުން ލިބުނު ދީލަތި އެހީތެރިކަމާއި އެއްބާރުލުމުގެ ސަބަބުންނެވެ.

 "މިފަދަ މާތް މަޤްސަދެއްގައި ކުރެވިގެންދާ ހުރިހާ މަސައްކަތްތަކަށްވެސް ތިޔަބޭފުޅުން ދެއްވާ ފުރިހަމަ އެއްބާރުލުން ފާހަގަކޮށް ހިތުގެ އެންމެ ފުންމިނުން ޝުކުރު ދަންނަވަން،" އެ ޖަމިއްޔާއިން ބުނެފައިވެއެވެ.

އެ ޖަމިއްޔާގެ އުއްމީދަކީ ކުރިއަށް އޮތް ތަނުގައިވެސް މިފަދަ ނިކަމެތި ހާލުގައި އުޅޭ އާއިލާތަކަށް އެހީތެރިވުމުގައި އާންމުންގެ ފަރާތުން ލިބޭ ލޯތްބާއި އެއްބާރުލުން މެދުނުކެނޑި ލިބިގެންދިއުމެވެ.

އެނގިފައިވާގޮތުގައި މިއީ ލ. ގަމުގައި ނިކަމެތި ހާލުގައި އުޅެމުންދިޔަ އާއިލާއެކެވެ.