އިސްރާއީލުގެ ކުރީގެ ބޮޑުވަޒީރު ނަފްތާލީ ބެނެޓް، އިސްރާއީލުން މިހާރު ކުރަމުންދާ ހަނގުރާމައިން ބަލިވަމުންދާކަމަށް ވިދާޅުވެ، ބެންޖަމިން ނަތަންޔާހޫގެ ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

2026 މާރިޗު 26 ގައި ''ޗެނަލް 12 އަދި ވައިނެޓް'' އަށް ދެއްވި ސީދާ އަދި ފާޅުކަން ބޮޑު އިންޓަވިއުތަކެއްގައި ބެނެޓް ވަނީ އިސްރާއީލު މިހާރު އޮތީ އިސްތިރާތީޖީ ގޮތުން މަރުތަޅެއްގައި ކަމަށް ސިފަކުރައްވާފައެވެ.

Ad by Hajj Corporation

ބެނެޓް ވިދާޅުވި ގޮތުގައި، ނަތަންޔާހޫގެ ސަރުކާރުން ދަމަހައްޓަމުން އައި "ފުރިހަމަ ކާމިޔާބީ" ގެ ވާހަކަތަކަކީ ހަގީގަތެއް ނެތް ވާހަކަތަކެކެވެ. 

"މިހާރު، އިސްރާއީލު ދައުލަތަށް ނުވަތަ ނަތަންޔާހޫގެ ސަރުކާރަށް އެއްވެސް ތަނަކުން މޮޅުވާނެ ގޮތެއް ނޭނގެއެވެ. ޣައްޒާއަކުން ނޫނެވެ، ލުބުނާނަކުންވެސް ނޫނެވެ؛ އެމީހުން އެއްވެސް ތަނަކުން މޮޅެއް ނުވެއެވެ،" ބެނެޓް ވިދާޅުވިއެވެ.

ހަނގުރާމައިގެ މަސްރަހާ ގުޅޭގޮތުން ވާހަކަދައްކަވަމުން ބެނެޓް ވިދާޅުވީ، ޣައްޒާގައި "ޖެހިގެން އަންނަ ދުވަހުގެ" ޕްލޭނެއް ނެތުމުގެ ސަބަބުން، ކުރިން ސާފުކޮށްފައިވާ ސަރަހައްދުތަކުގައި ހަމާސްއަށް އަލުން އުފެދުމުގެ ފުރުސަތު ލިބި، ހަނގުރާމަ ވަނީ ދާއިމީ ލޭއޮހޮރުވުމަކަށް ބަދަލުވެފައެވެ. އަދި ލުބުނާނުގެ ބޯޑަރު ސަރަހައްދުން ހިޒްބުالله ފަހަތަށް ޖެއްސުމަށް ސަރުކާރު ނާކާމިޔާބުވެފައިވާކަން އޭނާ ފާހަގަކުރެއްވިއެވެ.

އީރާނާ ގުޅޭގޮތުން ބެނެޓް ވިދާޅުވީ، ކާމިޔާބީ މިނަންވާނީ އިއުލާންތަކުން ނޫން ކަމަށާއި، ނަތީޖާއިން ކަމަށެވެ. އޭނާ ފާހަގަކުރެއްވި ގޮތުގައި ބޮޑު ކެމްޕޭންތަކެއް ހިންގި ނަމަވެސް، އީރާނުގައި އަދިވެސް 460 ކިލޯގެ ފައްކާކުރި ޔުރޭނިއަމް އެބަހުއްޓެވެ އަދި އެ ގައުމުގެ ވެރިކަން އޮތީ ބަދަލެއް ނުވެ އެގޮތުގައެވެ.

އިސްރާއީލުގެ އަސްކަރިއްޔާ (އައިޑީއެފް) އަކީ ބާރުގަދަ ބައެއް ނަމަވެސް، ގައުމީ ސަލާމަތަށްވުރެ ކޯލިޝަން ދެމެހެއްޓުމަށް އިސްކަންދޭ "ނާގާބިލު ސިޔާސީ ފަންތިއެއްގެ" ސަބަބުން އަސްކަރިއްޔާގެ އަތްފައި ވަނީ ބަނދެވިފައި ކަމަށް ބެނެޓް ތުހުމަތު ކުރެއްވިއެވެ. މިގޮތުން، ރިޒާވް ފޯސް ވަރުބަލިވެފައިވުމުގެ ސަބަބުން، އައި.ޑީ.އެފް އަށް މިހާރު 20,000 ސިފައިން މަދުވާ ކަމަށް އޭނާ ވިދާޅުވިއެވެ.

ބެނެޓްގެ މި ވާހަކަތަކަކީ އިސްރާއީލުގެ އެތެރޭގެ ސިޔާސީ މަސްރަހުގައި ނަތަންޔާހޫގެ ސަރުކާރަށް ކުރިމަތިވަމުންދާ ފާޑުކިޔުންތައް އިތުރަށް ވަރުގަދަވެގެންދިޔަ ކަމެކެވެ. ހާއްސަކޮށް ހަރެޑީ (އަލްޓްރާ-އޯތޮޑޮކްސް) މީހުން ސިފައިންގެއަށް ވެއްދުމާ ގުޅޭގޮތުން އުފެދިފައިވާ ހިޔާލުތަފާތުވުންތަކުގެ ތެރެއިން، ގައުމުގެ އަސްކަރީ ގާބިލުކަން ކުޑަވަމުންދާކަމުގެ އިންޒާރު އޭނާ ވަނީ ދެއްވާފައެވެ.