ނޮވެމްބަރު މަސް ނިމުމުގެ ކުރިން ގދ. ފިޔޯރީގައި އެޅުމަށް ހަމަޖެހިފައިވާ މަސްފެކްޓަރީގެ އަމަލީ މަސައްކަތް ފެށޭނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މައުލޫމާތުދެއްވާފައިވާކަމަށް ފިޔޯރީ ކައުންސިލުގެ ރައީސް ފައިޒަރު ރަޝީދު ވިދާޅުވެއްޖެއެވެ.

މިއަދު މެންދުރު 2 ގެ ހަބަރުގައި މިކަމުގެ އެންމެ ފަހުގެ މައުލޫމާތު ފައިޒަރުވަނީ މެންދުރު ޓީވީއާ ހިއްސާކުރައްވާފައެވެ.

"ދެމެހެއްޓެނިވި ގޮތެެއްގައި މަސްވެރިކަން ކުރިއަށްގެންދެވޭނީ މަސްފެކްޓަރީތައް ގާއިމުކުރެވިގެން. މި މަސް ނިމުމުގެ ކުރިން އެގްރީމަންޓްގައި ސޮއިކުރެވޭނެ. ނޮވެމްބަރުމަސް ނިމެންވާއިރަށް އަމަލީ މަސައްކަތް ފެށޭނެ.

ފިޔޯރީގައި އަޅަން ނިންމާފައިވަނީ 3000 މެޓްރިކް ޓަނުގެ ކޯލްޑް ސްޓޯރޭޖަކާއި ދުވާލަކު 100 ޓަނު ޕްރޮސެސް ކުރެވޭ މަސް ކާރުޚާނާއެކެވެ. މިއީ ދެކުނުގެ މަސްވެރިކަން އިތުރައް ތަރައްގީކޮށް މަސްކިރުމުގައި މަސްވެރިންނަށް ދިމާވާ ދަތިތައް ޙައްލުކޮށްދެއްވުމަށް ރައީސް ޑރ. މުޙައްމަދު މުޢިއްޒުގެ ސަރުކާރުން އަލަށް އެޅުމަށް އިޢުލާނުކޮށްފައިވާ މަސް ފެކްޓަރީއެކެވެ.

ފިޔޯރީގެ މަސްފެކްޓަރީ އެޅުމަށްޓަކައި ހަދަންޖެހޭ ޓެކްނިކަލް ޕްރޮޕޯސަލް ތައްޔާރު ކުރުމަށް ބޭނުންވާ މައުލޫމާތު އެއްކުރުމަށް ޗައިނާގެ ޑޮންފަންގް ކުންފުނީގެ ޓެކްނިކަލް ބޭފުޅުން 27 ޖޫން 2024ގައި ވަނީ އެރަށަށް ގޮސްފައެވެ.

ގދ. ފިޔޯރީއާއި ފ. ނިލަންދޫ އަދި ޅ. ފެލިވަރުގައި ތަރައްގީ ކުރުމަށް ނިންމާފައިވާ ފެކްޓްރީގެ މަސައްކަތް ކުރުމަށް ޗައިނާގެ ޑޮންފަންގް ކުންފުންޏާއެކު އެމްއޯޔޫގައި ސޮއިކޮށްފައިވަނީ 14 އެޕްރީލް 2024ވަނަ ދުވަހު މަސްވެރި ވުޒާރާގައެވެ.