އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އުފައްދާފައިވާ 1.776 ބިލިއަން ޑޮލަރުގެ "އެންޓި-ވެޕަނައިޒޭޝަން" ފަންޑާ ދެކޮޅަށް ވޮޝިންގްޓަން ޑީސީގެ ދެ ފުލުހަކު ކޯޓަށް މައްސަލަ ހުށަހަޅައިފިއެވެ.

މި ފަންޑަކީ ސަރުކާރުގެ ނުފޫޒުން އަނިޔާ ލިބިފައިވާ ކަމަށް ބުނާ ފަރާތްތަކަށް ބަދަލު ދިނުމަށް އުފައްދާފައިވާ ފަންޑެކެވެ.

Ad by Hajj Corporation

ބުދަ ދުވަހު މި ދައުވާ ހުށަހެޅީ ކެޕިޓަލް ފުލުހުންގެ ކުރީގެ އޮފިސަރު ހެރީ ޑަން އާއި މެޓްރޯޕޮލިޓަން ޕޮލިސް ޑިޕާޓްމަންޓްގެ އޮފިސަރު ޑެނިއަލް ހޮޖްސްއެވެ. މި ދެ އޮފިސަރުންނަކީ ޖެނުއަރީ 6، 2021 ގައި އެމެރިކާގެ ކެޕިޓަލް ހިސާރުކުރި ވަގުތު އެތަން ދިފާއުކުރުމުގައި ހަރަކާތްތެރިވެ އަނިޔާލިބުނު ދެ ފަރާތެވެ. އެމީހުން މި ފަންޑު ސިފަކޮށްފައިވަނީ "މި ގަރުނުގައި ރައީސަކު ހިންގި އެންމެ ބޮޑު ކޮރަޕްޝަންގެ އަމަލު" ގެ ގޮތުގައެވެ.

ދައުވާގައި ބުނެފައިވާ ގޮތުން، މި ފަންޑުގެ ބޭނުމަކީ ކެޕިޓަލްއަށް ހަމަލާދިން މީހުންނަށް ރައްޔިތުންގެ ޓެކްސް ފައިސާއިން ބަދަލު ދިނުމެވެ. "މި ފަންޑުން ފައިސާ ދޫކުރަން ފަށައިފިނަމަ، އެދުވަހު އަޅުގަނޑުމެންގެ ފުރާނައަށް ނުރައްކާކުރި ހަރުކަށި ޖަމާއަތްތަކަށް ސީދާ ގޮތުން މާލީ އެހީތެރިކަން ލިބިގެންދާނެ،" ކަމަށް ދައުވާގައި ބަޔާންކޮށްފައިވެއެވެ. ޓްރަމްޕް ވަނީ މީގެ ކުރިންވެސް ޖެނުއަރީ 6 ގެ ބައިވެރިންނަށް އިންސާފުވެރިކޮށް ކަންތައް ނުކުރެވޭ ކަމަށް ވިދާޅުވެ، އެމީހުންނަށް މައާފު ދެއްވާފައެވެ.

މި ފަންޑަކީ ޓްރަމްޕްގެ ޓެކްސް ރިޕޯޓްތައް ލީކުވުމާ ގުޅިގެން އައިއާރުއެސްއާ ދެކޮޅަށް އޭނާ ކުރެއްވި ދައުވާގެ ސެޓްލްމަންޓެއްގެ ގޮތުން އުފެއްދި ފަންޑެކެވެ. ޓްރަމްޕް ފުރަތަމަ އެދިވަޑައިގަތީ 10 ބިލިއަން ޑޮލަރުގެ ބަދަލަކަށެވެ. ނަމަވެސް، އޭނާގެ ބާރުގެ ދަށުގައި އޮތް ޖަސްޓިސް ޑިޕާޓްމަންޓާއެކު ވެވުނު އެއްބަސްވުމެއްގެ ދަށުން 1.776 ބިލިއަން ޑޮލަރު މި ފަންޑަށް ޖަމާކުރުމަށް ވަނީ ނިންމާފައެވެ. މިއީ މަސްލަހަތު ފުށުއަރާ ކަމެއްގެ ގޮތުގައި ގިނަ ބަޔަކު ދަނީ ފާހަގަކުރަމުންނެވެ.

ދައުވާ ހުށަހެޅި ދެ ފުލުހުން ބުނާ ގޮތުގައި، މި ފަންޑުގެ ސަބަބުން ހަމަލާދިން މީހުންނަށް ލިބޭ ހިތްވަރެއްގެ ސަބަބުން އެމީހުންނަށް ކުރިމަތިވަމުންދާ މަރުގެ އިންޒާރުތަކާއި ފުރައްސާރަ އިތުރުވެގެންދާނެއެވެ. އެހެންކަމުން، މި ފަންޑު އުވާލުމަށް އެމީހުން ވަނީ ކޯޓުގައި އެދިފައެވެ. މި މައްސަލަ މިހާރު ވަނީ ވޮޝިންގްޓަންގެ ޑިސްޓްރިކްޓް ކޯޓަށް ހުށަހަޅާފައެވެ.