ފުވައްމުލަކުގައި މީގެ 14 އަހަރު ކުރިން ހިންގި ނުރައްކާތެރި މާރާމާރީއެއްގައި އަބްދުﷲ ޝުހާދު މަރާލި މައްސަލައިގެ އިސްތިއުނާފު އަޑުއެހުމުގައި، އޭނާގެ މައިންބަފައިން މިއަދު ސުޕްރީމް ކޯޓުގައި ބުނީ ބޭނުންވަނީ ގިސާސް ހިފަން ކަމަށެވެ.

މި މައްސަލާގައި ދަށު ކޯޓުން މަރުގެ ހުކުމް އިއްވާފައިވަނީ ފުވައްމުލަކު ކަރަންކާއާގޭ ހަސަން ފަރީދުގެ މައްޗަށެވެ. 2010 ވަނަ އަހަރުގެ ޖެނުއަރީ މަހު އެ ރަށުގެ ދެ އަވަށެއްގެ ދެމެދުގައި ހިނގި ކުރިމަތިލުންތަކެއްގައި ޝުހާދަށް ހަމަލާދީ މަރާލި ކަން ސާބިތުވެ، ކްރިމިނަލް ކޯޓުން ފަރީދު މެރުމަށް ހުކުމް ކުރީ 2015 ގައެވެ. ހައިކޯޓުން އެ ނިންމުން ދެމެހެއްޓުމުން، އޭނާގެ ފަރާތުން މިހާރު ވަނީ އެ މައްސަލަ އެންމެ މަތީ ކޯޓުގައި އިސްތިއުނާފުކޮށްފައެވެ.

Ad by Hajj Corporation

ވީޑިއޯ ކޮންފަރެންސް މެދުވެރިކޮށް މިއަދު ބޭއްވި އަޑުއެހުމުގައި، ޝުހާދުގެ މަންމަ އާއި ބައްޕަ ވަނީ އެމީހުންގެ ނިންމުން ބަދަލުނުވާ ކަމަށް ބުނެފައެވެ. ދަށު ކޯޓުގައި ވެސް ބުނި ފަދައިން، ދަރިފުޅުގެ މަރަށްމަރު ހިފަން އެދޭ ކަމަށް އެ ދެމަފިރިން ފަނޑިޔާރުންގެ ކުރިމަތީގައި ތަކުރާރުކުރިއެވެ. މި ފުރުސަތުގައި ވާރިސުންނާ އެއްވެސް ވާހަކައެއް ދައްކަން ބޭނުންތޯ ސުވާލުކުރުމުން ފަރީދު ބުނީ އެފަދަ އެއްވެސް ޝައުގުވެރިކަމެއް ނެތް ކަމަށެވެ.

މި މައްސަލަ ބައްލަވާ ފަނޑިޔާރުންގެ ބެންޗަށް ބަދަލު އައިސްފައިވާތީ، އުއްތަމަ ފަނޑިޔާރު ޢަބްދުލްޣަނީ މުހައްމަދު ރިޔާސަތު ބަލަހައްޓަވާ އާ ބެންޗުން މިއަދު ވަނީ މައްސަލައިގެ ބަހުސްތައް އަލުން ކުރިއަށް ގެންގޮސްފައެވެ. ދައުލަތުން އެދުނީ ކުރީގެ ހުކުމްތައް ދަމަހައްޓައިދިނުމަށެވެ.

ޝަރީއަތުގެ ސަމާލުކަމަށް މިއަދު އައި އަނެއް ކަމަކީ، ފަރީދު ހައްޔަރުކުރި އިރު ތައްޔާރުކުރި ލިޔުމުގައި އޭނާ ސޮއިކޮށްފައި ނުވުމެވެ. ދައުލަތުން ބުނާ ގޮތުގައި އެއީ އޭނާގެ އަތަށް ލިބިފައިވާ އަނިޔާތަކެއްގެ ސަބަބުން ސޮއި ކުރެވޭ ފަދަ ހާލަތެއްގައި ނެތުމުންނެވެ. ނަމަވެސް ފަރީދު ވަނީ އެ ވާހަކަ ދޮގުކޮށް، އޭނާ ހުރީ ސޮއިކުރެވޭ ހާލަތުގައި ކަމަށް ބުނެފައެވެ.

މަރުގެ އަދަބަކީ އިންސާނެއްގެ ފުރާނައާ ގުޅިފައިވާ ކަމަކަށް ވާތީ، އުއްތަމަ ފަނޑިޔާރު ވަނީ އެ ދުވަސްވަރު ފަރީދުގެ ސިއްހީ ހާލަތު ހުރި ގޮތުގެ ރަސްމީ ރެކޯޑުތައް ހޯދައި ހުށަހެޅުމަށް ދައުލަތަށް އަމުރުކުރައްވާފައެވެ. އެ މައުލޫމާތުތައް ލިބުމުން ދެން އޮންނާނީ މި މައްސަލައިގެ އެންމެ ފަހު އަޑުއެހުމެވެ.