ދިވެހި ސަރުކާރުން އަލަށް ފެށި ދިވެހި ވަޠަނީ ޚިދުމަތުގެ ފުރަތަމަ ބެޗުގެ ތަމްރީނުތައް ނިންމައި، ސިފައިންގެ ޚިދުމަތާ ގުޅުނު ޒުވާނުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ އާއި ސާބަސް ރައްދުކުރައްވައިފިއެވެ.

މިކަމާ ގުޅިގެން ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، އަމިއްލަ ނަފްސަށް އިތުބާރުކުރާ، އަޤީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ދިވެހި ޤައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށް ސަރުކާރުން ފަށާފައިވާ ދިވެހި ވަޠަނީ ޚިދުމަތުގެ އިނީޝަލް ތަމްރީނުގެ ފުރަތަމަ ބެޗު ނިންމާލުމަކީ ލިބުނު ބޮޑު އުފަލެއް ކަމަށެވެ.

Ad by Hajj Corporation

މި އިނީޝަލް ތަމްރީނަށްފަހު، އެކި ދާއިރާތަކުން ކުރިއަށް ދިއުމަށް ލިބުނު ފުރުޞަތުގައި ސިފައިންގެ ޚިދުމަތާ ގުޅުމަށް ނިންމި ޒުވާނުންނަށް ހިންގި 72 ވަނަ ސިފައިންގެ އަސާސީ ތަމްރީނު ކޯހުން ރާއްޖޭގެ 20 އަތޮޅެއްގެ 70 ރަށަކަށް ނިސްބަތްވާ 137 ދަރިވަރުން ވަނީ ދަސްވެނިވެފައެވެ.

ރައީސުލްޖުމްހޫރިއްޔާ ވަނީ މި ކޯހުން އެކި ވަނަތައް ހާސިލުކުރި ހުރިހާ ބައިވެރިންނަށް މަރުޙަބާ ދަންނަވައި، ސިފައިންގެ މަތިވެރި ޚިދުމަތާ ގުޅުނު ހުރިހާ ޒުވާނުންނަށް އައްސަރިބަހާއި ސާބަސް ރައްދުކުރައްވާފައެވެ.

ދިވެހި ވަޠަނީ ޚިދުމަތަކީ ރާއްޖޭގެ ޒުވާނުންނަކީ ގައުމީ ލޯބި ހުރި، އަހުލާގު ރަނގަޅު، މަސައްކަތްތެރި ބަޔަކަށް ހެދުމަށްޓަކައި ރައީސް މުޢިއްޒުގެ ސަރުކާރުން އިސްނަގައިގެން ފެށި މުހިންމު މަޝްރޫޢެކެވެ. މި މަޝްރޫޢުގެ ދަށުން ތަމްރީނުވާ ޒުވާނުންނަށް ސިފައިންގެއާއި ފުލުހުންގެ ޚިދުމަތުގެ އިތުރުން ދައުލަތުގެ އެކި މުއައްސަސާތަކުގައި ޚިދުމަތް ކުރުމުގެ ފުރުޞަތު ފަހިވެގެންދާނެއެވެ.