ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި، އެ ޤައުމުގެ ރައީސް ޝީ ޖިންޕިންގްއަށާއި ސަރުކާރަށާއި ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހެޔޮ އެދުންތަކާއި ތަހުނިޔާ ފޮނުއްވައިފިއެވެ.

Ad by Hajj Corporation

ސޯޝަލް މީޑިއާގައި ހިއްސާކުރެއްވި މެސެޖެއްގައި އެމަނިކުފާނު ވިދާޅުވީ، ދިވެހިރާއްޖެއާއި ޗައިނާއާ ދެމެދު އޮތީ އެއް ޤައުމު އަނެއް ޤައުމަށް އޮތް އިޙްތިރާމާއި އިތުބާރުގެ މައްޗަށް ބިނާވެފައިވާ ބަދަހި ރަޙުމަތްތެރިކަމެއް ކަމަށެވެ. އަދި ދެ ޤައުމުންވެސް ގެންގުޅެނީ ތަރައްޤީއާއި ފާގަތިކަމަށް އޮތް އެއްގޮތް ތަޞައްވުރެއްކަން ފާހަގަކުރައްވައި، ރާއްޖޭގެ ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއްކަމަށް ރައީސް ވިދާޅުވިއެވެ.

ދެ ޤައުމުގެ މެދުގައި ޤާއިމުކުރެވިފައިވާ އިސްތިރާޖީ ގުޅުން އިތުރަށް ބަދަހިކޮށް، ގުޅުން އައު ހަރުފަތަކަށް ގެންދިއުމަށް ދިވެހި ސަރުކާރުން އަބަދުވެސް ސާބިތުކަމާއެކު ދެމިއޮންނާނެ ކަމަށް ރައީސް މުޢިއްޒު ވަނީ ވިދާޅުވެފައެވެ. ޗައިނާގެ ޤައުމީ ދުވަހަކީ 1949 ވަނަ އަހަރުގެ އޮކްޓޫބަރު މަހުގެ 1 ވަނަ ދުވަހު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހެވެ. ދިވެހިރާއްޖެއާއި ޗައިނާއާ ދެމެދު ސިޔާސީ ގުޅުން ޤާއިމުކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހު ކަމަށްވާއިރު، މިއަހަރު މި ގުޅުމަށް 54 އަހަރު ފުރޭނެއެވެ.