81,000 ޑޮލަރާއެކު އެއާޕޯޓުން ހިފެހެއްޓި ބިދޭސީ މީހާގެ މައްޗަށް މަނީލޯންޑަރިންގެ ތުހުމަތު ކުރެވޭ މައްސަލައެއް ދިވެހި ފުލުހުންގެ ޚިދުމަތުން ތަހުގީގުކުރަން ފަށައިފިއެވެ.

މިދިޔަ އާދިއްތަ ދުވަހު އެއާޕޯޓުން 81،000 އަށްވުރެ ގިނަ ޑޮލަރާއެކު ރާއްޖެއިން ފުރަންދިޔަ ބިދޭސީ މީހަކު އެއާޕޯޓް ސެކިއުރިޓީއިން ހައްޔަރުކުރިއެވެ.

އޭނާ ފުލުހުންނާ ހަވަލުކޮށްފައިވާއިރު އޭނާގެ މައްޗަށް ތުހުމަތު ކުރެވެނީ މަނީ ލޯންޑަރިންގެ ކުށުގެ ދައުވާއެވެ. މި މައްސަލައާމެދު ފުލުހުން ބުނި ގޮތުގައި އޭނާ އަކީ އުމުރުން 32 އަހަރުގެ ޝަހްމިން އިސްލާމް ޝަރުގް ނަމަކަށްކިޔާ މީހެކެވެ.

އެގޮތުން އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށް ފުލުހުން ބުނެފައިވެއެވެ.

ޝަހްމިން ހައްޔަރުކުރީ ކޯންފޮލެކްސް ފޮށިތަކެއްގައި ނަގުދު ފައިސާގެ ގޮތުގައި ޑޮލަރު ބަންދުކޮށްގެން ފުރަން ގޮސް ހުއްޓައެވެ. އޭނާގެ ޑޮލަރުތައް ފަޅާ އެރީ އެއާޕޯޓު ސެކިއުރިޓީ ސްކްރީނިންއިންއެވެ.