ކޮންމެ އަހަރެއްގެ ވެސް ޖޫން މަހުގެ 21 ވަނަ ދުވަހަކީ ދުނިޔޭގައި ބައްޕައިންގެ ދުވަހުގެ ގޮތުގައި ފާހަގަކުރަމުން އަންނަ ހާއްސަ ދުވަހެކެވެ. މިއީ އާއިލާއެއް ބިނާކުރުމުގައްޔާއި، ދަރިން ހެޔޮގޮތުގައި ތަރުބިއްޔަތު ކުރުމުގައި ބައްޕައިން ކުރާ ބުރަ މަސައްކަތާއި، ވާ ނުފެންނަ ބޮޑެތި ޤުރުބާނީތަކުގެ އަގު ވަޒަންކޮށް، އެ ހިތްވަރަށް ސާބަސްދޭ ދުވަހެކެވެ.

ޝައްކެއްނެތް އިސްލާމްދީނަކީ މައިންބަފައިންނަށް ހެޔޮކޮށް ހިތުމަށާއި، އެމީހުންނަށް ކިޔަމަންތެރިވުމަށް އެންމެ ބޮޑަށް ބާރުއަޅާ ދީނެވެ. ކީރިތި ޤުރުއާނުގައި ﷲ ތަޢާލާ ވަނީ އެކަލާނގެއަށް އަޅުކަންކުރުމަށް އަމުރުކުރެއްވުމާ ވިދިގެން މައިންބަފައިންނަށް ހެޔޮކޮށް ހިތުމަށް ވަސިއްޔަތް ކުރައްވާފައެވެ.

Ad by Hajj Corporation

"އަދި މައިންބަފައިންނަށް ހެޔޮކޮށް ހިތުމަށް ތިޔަބައިމީހުންގެ ވެރިރަސްކަލާނގެ ކަނޑައަޅުއްވައި އަމުރުކުރެއްވިއެވެ..." (ސޫރަތުލް އިސްރާ: 23)

ހަދީޘްފުޅުތަކުން އެނގޭ ގޮތުގައި ބައްޕައަކީ ސުވަރުގޭގެ ދޮރުތަކުގެ ތެރެއިން އެންމެ މެދު ދޮރެވެ. ބައްޕަގެ ނުރުހުމަކީ ﷲގެ ކޯފާލެއްވުން ހުރި ކަމެކެވެ. އެހެންކަމުން މުސްލިމުންގެ ގޮތުގައި ތިބެ، ބައްޕައިންނަށް އިހުތިރާމްކޮށް ހެޔޮކޮށް ހިތުމަކީ ހަމައެކަނި އަހަރަކު އެއްދުވަހު ކުރަންޖެހޭ ކަމެއް ނޫނެވެ. އެއީ މުޅި އުމުރަށް ދެމިގެންދާންޖެހޭ އަޅުކަމެކެވެ.

އަޅުގަނޑުމެންގެ އާއިލާގެ މައިބަދައަކީ އަދި ދިރިއުޅުމުގެ ކޮޅިގަނޑުތަކުން އަހަރެމެން ސަލާމަތްކޮށްދޭ ބަނދަރަކީ ބައްޕައެވެ. އެއީ "ހިޔާވަހިކަމާއި ރައްކާތެރިކަން" ރަމްޒުކޮށްދޭ ފަރާތެވެ. ދަރިންނަށް ބޭނުންވާ އަސާސީ ބޭނުންތައް (ކާބޯތަކެތި، ފޭރާން، ބޯހިޔާވަހިކަން އަދި ތައުލީމް) ހޯދައިދިނުމަށް ކަނޑާއި އެއްގަމުގައި ރޭދުވާ ބަހާލައިގެން ބައްޕައިން ކުރާ މަސައްކަތަކީ އޭގެ އަގު ވަޒަންނުކުރެވޭނެ ފަދަ ބުރަ މަސައްކަތްތަކެކެވެ. ދަރިންނަށް ދިރިއުޅުމުގެ އަޚްލާޤާއި، ހިތްވަރާއި، ސާބިތުކަން ދަސްކޮށްދޭ އެންމެ ފުރަތަމަ މުދައްރިސަކީ ބައްޕައެވެ. ބައްޕަގެ ހިތްވަރުގަދަކަމުން ދަރިންނަށް ދިރިއުޅުމުގެ ގޮންޖެހުންތަކާ ކުރިމަތިލާން ދަސްވެއެވެ. ބައްޕައެއްގެ ހިޔާވަހިކަމާއި ލޯބި ލިބިގެން ބޮޑުވާ ކުދިންނަކީ ނަފްސާނީ ގޮތުން ދުޅަހެޔޮ އަމިއްލަ ނަފްސަށް އިތުބާރު ބޮޑު ކުދިންނަށް ވާކަމަށް ޒަމާނީ ހޯދުންތަކުން ދައްކައެވެ.

ބައްޕައެއްގެ ޤުރުބާނީއަކީ ގިނަ ފަހަރަށް މުޖުތަމައަށް ފާޅުގައި ނުފެންނަ، ނަމަވެސް އާއިލާގެ ދިރުމާ ގުޅިފައިވާ ހިމޭން ލޯތްބެކެވެ. މަންމައެއްގެ އޯގާތެރިކަމާއި ހަމްދަރުދީ ކަރުނައިގެ ސިފައިގައި ފެންނައިރު، ބައްޕައެއްގެ ލޯތްބާއި ޤުރުބާނީ ފެންނަނީ އޭނާ އާއިލާއަށްޓަކައި އުފުލާ ބުރަ އުފުލުމާއި އޮއްސާ ދަލުންނެވެ.

ބައްޕަ އޭނާގެ އަމިއްލަ އެދުންތަކާއި، އުފާތަކާއި، އަދި އަރާމު ވަގުތުތައް ގުރުބާންކުރަނީ ހިނިތުންވުމަކާއެކުގައެވެ. އަމިއްލަ ނަފްސަށް އާ ފޭރާމެއް ނުވަތަ ބޭނުންވާ އެއްޗެއް ގަތުމުގެ ބަދަލުގައި، ބައްޕަ އިސްކަންދޭނީ ދަރިފުޅަށް ބޭނުންވާ ފޮތްބަޔާއި، ކުޅޭ އެއްޗެއްސާއި، އަދި ރަނގަޅު ކާނާ ހޯދައިދިނުމަށެވެ. ބައްޕައެއްގެ އަލަމާރިން އަބަދުވެސް ފެންނާނީ ބާވެފައިވާ މަދު ހެދުންކޮޅެކެވެ. ނަމަވެސް ދަރިން ތިބޭނީ އެންމެ ފަހުގެ ފޭރާމުގައެވެ.

ދިވެހިރާއްޖޭގެ މާހައުލަށް ބަލާއިރު، މަސްވެރިކަމުގައްޔާއި، ފަތުރުވެރިކަމުގެ ދާއިރާގައްޔާއި، ރަށުން ބޭރުގައި (ރިސޯޓުތަކާއި މާލޭގައި) އާއިލާއާ ދުރުގައި އެތައް މަހެއްވަންދެން ބައްޕައިން މަސައްކަތް ކުރަނީ ހަމައެކަނި ދަރިންގެ މުސްތަޤްބަލް ބާއްޖަވެރި ކުރުމަށެވެ.

އަވީގައްޔާއި، ފިނީގައި، އަދި ކަނޑުގެ ގަދަ ރާޅުތަކުގެ ތެރޭގައި ބައްޕަ އޮއްސާ ކޮންމެ ދާޖިހަކީ ދަރިންގެ މޫނުމައްޗަށް އުފާވެރިކަން ގެނެސްދޭ ބާރެކެވެ.

ހަށިގަނޑަށް ކިތަންމެ ބޮޑު ތަދެއް ނުވަތަ ވަރުބަލިކަމެއް އިހުސާސްވިޔަސް، ގޭގެ ދޮރުން އެތެރެވާއިރު ބައްޕަގެ މޫނުމަތިން ފެންނާނީ ހިނިތުންވުމެކެވެ. އެއީ އޭނާގެ ވަރުބަލިކަމުގެ ސަބަބުން ދަރިންގެ ހިތަށް ބުރަކަމެއް ނުދިނުމަށެވެ. ދަރިއަކު އިމްތިޙާނަކުން އެއްވަނަ ހޯދުމުން ނުވަތަ ދިރިއުޅުމުގައި ބޮޑު ކާމިޔާބީއެއް ހާސިލުކުރުމުން، އެންމެންގެ ފުރަގަހުގައި އުފާވެރިކަމުގެ ކަރުނުން ދެލޯ ފުރިފައި ހުންނާނީ ބައްޕައެވެ.

ކޮންމެ ނުރައްކަލަކުންނާއި، ދިރިއުޅުމުގެ ތޫފާންތަކުން އާއިލާ ސަލާމަތްކުރާ އައްޑަނައަކީ ބައްޕައެވެ. ގޭގެ ޚަރަދުތައް ދެކޮޅު ނުޖެހިގެން ހާސްވާ ހިނދުވެސް، ދަރިންގެ ކުރިމަތީގައި "ހުރިހާ ކަމެއްވެސް ރަނގަޅުވާނެ" ކަމުގެ ޔަގީންކަންދޭ ހިތްވަރުގަދަ ލީޑަރަކީ ބައްޕައެވެ.

ބައްޕައިންގެ ދުވަހަކީ ހަމައެކަނި ކޭކެއް ފަޅާލައި، ސޯޝަލް މީޑިއާގައި ފޮޓޯއެއް ހިއްސާކޮށްލުމުން ނިންމާލެވޭނެ ދުވަހެއް ނޫނެވެ. އެއީ ބައްޕަގެ މުހިންމުކަން ހިތުގެ އަޑިން ގަބޫލުކޮށް، ދިރިހުރިނަމަ އެމީހުންނަށް އޯގާތެރިވެ، ދުނިޔެ ދޫކޮށް ގޮސްފައިވާނަމަ އެމީހުންނަށް ހެޔޮ ދުޢާ ފޮނުވުން އިތުރުކުރަންވީ ދުވަހެކެވެ.