ދިވެހިރާއްޖޭގެ އިޤްތިޞާދާއި ދިރިއުޅުމުގެ ނިޒާމަށް މޫދުވިނައާއި، ކުޅި އަދި ޗަސްބިންތަކަކީ ކޮންމެހެން ބޭނުންތެރި ތަންތަން ކަމަށާއި، މިފަދަ ސަރަހައްދުތައް ރައްކާތެރިކުރުމަށް ދުނިޔޭގެ އެހީތެރިކަމާއި އެއްބައިވަންތަކަން މުހިންމު ކަމަށް މޫސުމީ ބަދަލުތަކާއި، ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފް ބަޔާންކުރައްވައިފިއެވެ.

ބެންގްކޮކުގައި ކުރިއަށްދިޔަ އދގެ ތިމާވެއްޓާއި ތަރައްޤީއާ ބެހޭ ކޮމިޓީގެ 9 ވަނަ ބައްދަލުވުމުގެ ތެރެއިން ބޭއްވުނު 'ބްލޫ ކާރބަން' ހަރަކާތެއްގައި ވާހަކަދައްކަވަމުން ވަޒީރު ވަނީ ރާއްޖޭގެ ދިރޭތަކެތީގެ ނަސްލުތަކުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެމަނިކުފާނު ފާހަގަކުރެއްވި ގޮތުގައި މޫދުވިނައާއި ޗަސްބިންތަކަކީ ޖައްވުން ކާރބަން ދަމައިގަތުމުގެ ބާރު ލިބިފައިވާ މުހިންމު ވަސީލަތްތަކެކެވެ. މީގެ އިތުރުން، މި ސަރަހައްދުތަކަކީ ކަނޑުގެ ލޮނުގަނޑު އުފުލުމުން ރަށްތަކަށް ލިބޭ ގެއްލުން ކުޑަކޮށްދީ، މަސްވެރިކަމާއި ފަތުރުވެރިކަމުގެ ދާއިރާއަށް ބޮޑެތި މަންފާތަކެއް ކޮށްދޭ ތަންތަންކަން ވަޒީރު ހާމަކުރެއްވިއެވެ.

Ad by Hajj Corporation

ބްލޫ ކާރބަންގެ ދާއިރާއިން ރާއްޖެއިން ކުރަމުންދާ މަސައްކަތްތަކަށް އިޝާރާތްކުރައްވައި، ހިމާޔަތްކޮށްފައިވާ ސަރަހައްދުތައް އިތުރުކުރުމާއި ޤުދުރަތީ ވަސީލަތްތައް މެދުވެރިކޮށް މޫސުމީ މައްސަލަތަކަށް ހައްލު ހޯދުމަށް ކުރެވޭ ކަންކަން ވަޒީރު ފާހަގަކުރެއްވިއެވެ. ނަމަވެސް، މި މަސައްކަތްތައް ކާމިޔާބުކުރުމަށްޓަކައި ބޭރުގެ މާލީ އެހީތެރިކަމާއި، ކާރބަން މިންކުރުމުގެ އެއްގޮތް އުސޫލުތަކެއް ބޭނުންވާކަމަށް އެމަނިކުފާނު ވިދާޅުވިއެވެ.

ވަޒީރުގެ ވާހަކަފުޅު ނިންމަވާލެއްވީ، ރަށްރަށުގެ މުޖުތަމަޢުތައް ބާރުވެރިކުރުވުމަށް ސަރަޙައްދީ އެއްބާރުލުން އިތުރުކުރުމަށް ގޮވާލައްވަމުންނެވެ. އަދި ބްލޫ ކާރބަން ނިޒާމުތަކަކީ ތިމާވެށީގެ ދެމެހެއްޓެނިވިކަމާއި ރައްޔިތުންގެ ފާގަތިކަމަށް އޮތް އެންމެ މުހިންމު މަގުކަންވެސް ވަޒީރު ޢަލީ ޝަރީފް ފާހަގަކުރެއްވިއެވެ.