ފީފާ ވޯލްޑް ކަޕް މުބާރާތުން ޕޯޗުގަލް ކެޓުމާ ގުޅިގެން، އެ ޓީމުގެ ހެޑް ކޯޗުގެ މަގާމުން ރޮބާޓޯ މާޓީނޭޒް ރަސްމީކޮށް ވަކިވެއްޖެއެވެ. ސްޕެއިންއަށް ނިސްބަތްވާ މާޓީނޭޒް ޕޯޗުގަލްގެ ގައުމީ ޓީމާ ހަވާލުވީ 2023 ވަނަ އަހަރުގައެވެ. އޭނާގެ އިރުޝާދުގެ ދަށުން ޕޯޗުގަލް އިން ވަނީ 2025 ވަނަ އަހަރުގެ ޔޫއެފާ ނޭޝަންސް ލީގު ކާމިޔާބުކޮށްފައެވެ.

މާޓީނޭޒް މަގާމުން ވަކިވުމަކީ އޭނާގެ ކޮންޓްރެކްޓްގައިވާ ވަކި މާއްދާއެއްގެ ދަށުން ކުރިން ނިންމާފައިވާ ނިންމުމެއް ކަމަށް ރިޕޯޓްތައް ބުނެއެވެ. މަސްދަރުތަކުން ކަށަވަރުކޮށްދޭ ގޮތުގައި، މުބާރާތް ނިމުމުގެ މާ ކުރިންވެސް އޭނާ އޮތީ މި ނިންމުން ނިންމާފައެވެ. ތިން އަހަރުގެ ދައުރަކަށްފަހު މާޓީނޭޒް ވަނީ އޭނާގެ އިސްތިއުފާ ވަގުތުން ތަންފީޒުކުރުމަށް ނިންމާފައެވެ.

Ad by Hajj Corporation

މާޓީނޭޒް ވަކިވުމާ ގުޅިގެން، ޕޯޗުގަލްގެ ގައުމީ ޓީމުގެ އާ ކޯޗަކަށް ޖޯޖް ޖީސަސް އައްޔަންކުރުމަށް ވަނީ ނިންމާފައެވެ. ޕޯޗުގަލްގެ ނޫހެއް ކަމަށްވާ 'އޭ ބޯލާ' އިން ރިޕޯޓްކޮށްފައިވާ ގޮތުގައި، ކޮންޓްރެކްޓްގެ ފަހުގެ ކަންކަން ފުރިހަމަކުރުމަށް ޖީސަސް ވަރަށް އަވަހަށް ޕޯޗުގަލްގެ ފުޓްބޯޅަ ފެޑެރޭޝަނާ ބައްދަލުކުރާނެއެވެ.

ޖޯޖް ޖީސަސް އަކީ ޕޯޗުގަލް، ބްރެޒިލް އަދި ސައުދީ އަރަބިއްޔާގެ ކްލަބްތަކުގައި ބޮޑެތި ކާމިޔާބީތަކެއް ހޯދާފައިވާ ތަޖުރިބާކާރު ކޯޗެކެވެ. ޕޯޗުގަލްގެ ފެޑެރޭޝަނުން ގައުމީ ޓީމު ކުރިއަށް ގެންދިއުމަށް އެންމެ ބޭނުންވާ ކޯޗަކީވެސް އޭނާއެވެ.

ދުނިޔޭގެ ފެންވަރުގެ މޮޅު ކުޅުންތެރިން ހިމެނޭ ޕޯޗުގަލްގެ ސްކޮޑާ ޖީސަސް ހަވާލުވާއިރު، އޭނާގެ ކުރިމަތީގައި ބޮޑެތި ގޮންޖެހުންތަކެއް ހުންނާނެއެވެ. މި އައްޔަންކުރުމާއެކު ޕޯޗުގަލްގެ ފުޓްބޯޅައަށް އާ ދައުރެއް ފެށިގެންދާނެ ކަމަށް ބެލެވެއެވެ.