މާލެއިން ފުރައިގެން ގދ. ތިނަދުއަށް ދަތުރުކުރަނިކޮށް ވ. ފެލިދޫގެ ހުޅަނގު ފަރާތުން ދިޔަވެ، އަޑިއަށްދިޔަ "ޖަޒީރާ" ބޯޓުގައި ތިބި އެންމެން ފުލުހުންގެ އެހީތެރިކަމާއެކު ރައްކާތެރިކަމާއެކު ފުލިދުއަށް ގެންގޮސްފިއެވެ.

ފުލުހުން ހާމަކުރެއްވި ގޮތުގައި މުދާ އުފުލާ މި ބޯޓު އަޑިއަށްދާ ކަމުގެ ރިޕޯޓު ލިބިފައިވަނީ މިއަދު ހަވީރު 15:26 ހާއިރުއެވެ. މި ހާދިސާ ހިނގިއިރު ބޯޓުގައި ތިބީ ތިން ދިވެހިންނާއި ހަތަރު ބިދޭސީންނެވެ. ފުލުހުންގެ ބެލުމުގެ ދަށުން މި ހަތް މީހުން ފުލިދުއަށް ގެންގޮސްފައިވާއިރު، އެ އެންމެންގެ ސިއްހީ ހާލަތުވެސް ރަނގަޅު ކަމަށް ފުލުހުން މައުލޫމާތު ދެއްވައެވެ.

Ad by Hajj Corporation

އެމްއެންޑީއެފުން މިހާރު ދަނީ ބޯޓު ފުންކުރުމުގެ މަސައްކަތް ކުރަމުންނެވެ. ނަމަވެސް ފެލިދޫގެ ހުޅަނގުން 5 ނޯޓިކަލް މޭލު ބޭރުން ބޯޓުގެ ބައެއް މުދާތައް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުން އެކަމަށް ސަމާލުވުމަށް އެމްއެންޑީއެފުން ވަނީ އެދިފައެވެ.

އެމްއެންޑީއެފް ކޯސްޓްގާޑުން އިތުރަށް ވިދާޅުވީ، ބޯޓުން ބޭރުވި ތަކެތި އޮޔާދާނީ އިރުމައްޗަށް ކަމަށް ލަފާކުރެވޭ ކަމަށެވެ. އެހެންކަމުން އެ ސަރަހައްދުން ދަތުރުކުރާ ފަރާތްތަކުން، ހާއްސަކޮށް ރޭގަނޑު ވަގުތުތަކުގައި ދަތުރުކުރާއިރު ނުހަނު ބޮޑަށް ސަމާލުވުމަށް ވަނީ އިލްތިމާސްކޮށްފައެވެ.