ތ. ދިޔަމިގިލީގައި ސިފައިން އިމާރާތްކުރަމުންދާ ސްކޫލްގެ އާ އިމާރާތުގެ ފުރަތަމަ ފަންގިފިލާގެ ރޭނުމުގެ ހުރިހާ މަސައްކަތެއް ނިންމާލައިފިއެވެ.

މި މަޝްރޫއަކީ އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިންނާ ގުޅިގެން އެމްއެންޑީއެފް ސަރވިސް ކޯރގެ މިލިޓަރީ އިންޖިނިއަރސް (އެމްއީ)ގެ ފަންނީ ސިފައިން ކުރިއަށްގެންދާ މަސައްކަތެކެވެ. މަސައްކަތުގެ މިހާރުގެ ތަފްސީލަށް ބަލާއިރު، ފުރަތަމަ ފަންގިފިލާގެ ފާހާނާތަކުގެ ތަޅުންއެޅުމާއި، ތަނބުތަކާއި ބެރިތަކުގެ ދާރަ ހެދުމުގެ މަސައްކަތްތައް ދަނީ ބާރުސްޕީޑުގައި ކުރިއަށެވެ. މީގެ އިތުރުން، އިމާރާތުގެ ދެވަނަ ފަންގިފިލާގެ ރޭނުމުގެ އަމަލީ މަސައްކަތްވެސް މިހާރު ވަނީ ފަށާފައެވެ.

Ad by Hajj Corporation

ޖުމްލަ 10 ކުލާސް ރޫމް ހިމެނޭ ގޮތަށް ދެ ފަންގިފިލާއަށް ބިނާކުރާ މި އިމާރާތުގެ މަސައްކަތް އަވަސްކުރުމަށްޓަކައި ސިފައިންނާ ހަވާލުކޮށްފައިވަނީ މިއަހަރުގެ މާރިޗު މަހުގެ 31 ވަނަ ދުވަހުއެވެ. ސިފައިން މި މަސައްކަތާ ހަވާލުވިއިރު، މުޅި އިމާރާތުގެ ނިމިފައިވަނީ އެންމެ 30 އިންސައްތަ މަސައްކަތެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ތައުލީމީ ދާއިރާގެ އުމްރާނީ ތަރައްގީއަށް ދެއްވާ ހާއްސަ އަހަންމިއްޔަތުގެ ދަށުން ކުރިއަށްދާ މި މަސައްކަތް ނިމުމުން، ދިޔަމިގިލީގެ ދަރިވަރުންނަށް އުނގެނުމުގެ ފަހި މާހައުލެއް ގާއިމުވެގެންދާނެއެވެ.