ކްލަބް މޯލްޑިވްސް 2024 ގެ ޗެމްޕިއަންކަން މި ފަހަރު ވެސް ކްލަބް ވެމްކޯ އިން ހޯދައިފިއެވެ.

މިދިޔަ އަހަރުގައި ވެސް ޗެމްޕިއަންކަން ހޯދި ވެމްކޯ އިން، މި އަހަރު އެ މަގާމު ހޯދީ ވެސް މިދިޔަ އަހަރު ވެސް ފައިނަލުގައި ކުޅުނު ރޯޑް ރެކްރިއޭޝަން ކްލަބް (އާރްއާރްސީ) ބަލިކޮށްގެންނެވެ.

އެގޮތުން މިދިޔަ އަހަރުގެ ފައިނަލުން ވެމްކޯ މޮޅުވީ ފަސް ލަނޑު، ތިން ލަނޑުންނެވެ. ރޭ ކުޅުނު މި އަހަރުގެ ފައިނަލުގައި ވެމްކޯ މޮޅުވީ ހަތަރު ލަނޑު ތިން ލަނޑުންނެވެ. މިއީ ކްލަބް މޯލްޑިވްސްގެ ތާރީޚުގައި ވެސް، އެއް ޓީމަކުން ޖެހިޖެހިގެން އެ މުބާރާތް ކާމިޔާބުކުރި ހަތަރު ވަނަ ފަހަރެވެ. މީގެ ކުރިން އެސްޓީއޯ، އެމްޕީއެލް އަދި އެމްއޭސީއެލް އިން ވަނީ އެކަން ޙާސިލުކޮށްފައެވެ.

ރޭ ކުޅުނު ފައިނަލުގައި ފުރަތަމަ ލަނޑު ޖެހީ ވެސް އާރްއާރްސީންނެވެ. އެގޮތުން އެ މެޗުގައި އާރްއާރްްސީން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އަބްދުﷲ މިދުހަތު ފަހުމީ (ބިޗަޑް) އެވެ. އެހެން ނަމަވެސް ކުޅުން ރަނގަޅުކޮށް، ވެމްކޯ އިން ފުރަތަމަ ހާފު ނިމުމުގެ ކުރިން ގޯލެއް ޖެހިއެވެ. އެ ލަނޑު އެ ޓީމަށް ކާމިޔާބުކޮށްދިނީ އިބްރާހިމް މަހުދީ (ފޭދޫ އިއްބެ)އެވެ.

އެ މެޗުގެ ބާކީ ތިން ގޯލު ވެސް ވެމްކޯ އިން ޖެހީ، މެޗުގެ ދެވަނަ ހާފުގައެވެ. އެގޮތުން ވެމްކޯގެ ތިން ލަނޑު ވެސް ކާމިޔާބުކޮށްދިނީ އެ ޓީމުގެ ކެޕްޓަން އަލީ ޝިޔާހު އެވެ. އެ ހާފުގައި އާރްއާރްސީ އަށް ވެސް ރަނގަޅު ގިނަ ފުރުސަތުތަކެއް ލިބުނު ނަމަވެސް، ބޭނުންކުރެވޭ ގޮތެއް ވަނީ ނުވެފައެވެ.

އެ ނަތިޖާއާއެކު މެޗު ނިމުނު އިރު، އެ މެޗުގެ އެންމެ މޮޅު ކުޅުންތެރިޔަކަށް ހޮވުނީ ވެމްކޯ ޓީމުގެ ތަޖުރިބާކާރު އީރާން ކުޅުންތެރިޔާ، އަލީ ރިޒާއެވެ. މުބާރާތުގެ އެންމެ މޮޅު ކުޅުންތެރިޔާއަކަށް ނުވަތަ ކިންގް އޮފް ފުޓްސަލް އަކަށް ހޮވުނީ ވެސް އެ ޓީމުގެ އަބްދުﷲ ޖުނައިދު (ޖެންނޭ) އެވެ. އެންމެ މޮޅު ކޯޗަކަށް ވެސް އެ ޓީމުގެ ކޯޗު އަހުމަދު ތޯހާ ހޮވުނު އިރު، އެ ޓީމުގެ ތިން ކުޅުންތެރިޔަކު ވަނީ ޑްރީމް ޓީމުގައި ހިމެނިފައެވެ.

އެއީ ޝިޔާހު، ޖުނައިދު އަދި އެ ޓީމުގެ ކީޕަރު އަބްދުﷲ ޒިމާމްއެވެ. އިތުރަށް އެ ޓީމުގައި ހިމެނުނީ އާރްއާރްސީގެ އަލީ ހާފިޒް އާއި މިދުހަތުއެވެ. އެ މުބާރާތުގެ އެންމެ އުންމީދީ ކުޅުންތެރިޔަކަށް މޯލްޑިވިއަންގެ އަހުމަދު އަފްޒާލް ހޮވުނު އިރު، ފެއާ ޕްލޭ ޓީމަކަށް ހޮވުނީ ދިވެހި ސިފައިންގެ ކްލަބެވެ.