މި އަހަރުގެ ކްލަބު މޯލްޑިވްސް ސީޒަން ހުޅުވުމަށް ކުޅޭ ކިންގްސް ކަޕް މެޗު ޝަރަފްވެރި ކޮށްދެއްވާނީ ނައިބު ރައީސް އަލްއުސްތާޛު ހުސައިން މުހައްމަދުު ލަތީފު ކަމަށް ކްލަބު މޯލްޑިވްސް އިން ބުނެފި އެވެ.

ފާއިތުވި އަހަރުގެ ކްލަބް މޯލްޑިވްސްގެ ޗެމްޕިއަން ކްލަބް ވެމްކޯ އާއި ރިސޯޓު ސުޕަރ ލީގުގެ ޗެމްޕިިއަން ޖޯލި މޯލްޑިވްސް ބައްދަލުކުރާ ކިންގްސް ކަޕް މެޗު ފެށުމަށް ހަމަޖެހިފައިވަނީ މިރޭ 9 ޖަހާއިރު، އި ހުޅުމާލެ ރެހެންދި ޓާފް އެއް ނަމްބަރު ދަނޑުގަ އެވެ.

އެހެން އަހަރުތަކެކޭ ވެސް އެއްގޮތަށް ކްލަބު މޯލްޑިވްސް ސީޒަންގައި ކްލަބް މޯލްޑިވްސް ކްލަސިކް، އަންހެން ކުޅުންތެރިންނަށް ހާއްސަ އެއިޓީން ތާޓީ ފުޓްސަލް ފިއެސްޓާ އަދި ކްލަބު މޯލްޑިވްސް ކަޕް ފެށިގެންދާނެ އެވެ. ނަމަވެސް މިރޭ ކުޅުމަށް ހަމަޖެހިފައި ވަނީ މުބާރާތް ހުޅުވާ މެޗުގެ ގޮތުގައި ކުޅޭ ކިންގްސް ކަޕް މެޗެވެ.

ކްލަބް މޯލްޑިވްސް ކްލަސިކް އާއި އެއިޓީން ތާޓީ ފުޓްސަލް ފިއެސްޓާ ފަށާނީ ސެޕްޓެމްބަރު މަހުގެ ތިންވަނަ ދުވަހު އެވެ. އަދި ކްލަބް މޯލްޑިވްސް ކަޕް ފަށަން ތާވަލުކޮށްފައިވަނީ، ސެޕްޓެމްބަރު މަހުގެ 23 ވަނަ ދުވަހު އެވެ.

މިރޭ އޮންނަ ކްލަބު މޯލްޑިވްސް ސީޒަން ހުޅުވުގެ ރަސްމިއްޔާތުގައި މުބާރާތުގެ ޗެމްޕިއަން ޓްރޮފީތައް ދައްކާލުމާއި، ޓީމުތަކުން ބޭނުންކުރާ ޖާޒީގެ ހޯމް އެންޑް އަވޭ ކިޓް ދައްކާލުމުގެ ޝޯއެއް ކުރިއަށްދާނެ އެވެ.

މިއަހަރުގެ މުބާރާތްތަކުގެ ގުރު ނަގާފައިވާއިރު، ކްލަބް މޯލްޑިވްސް ކަޕްގައި 28 ޓީމެއް ވާދަކުރާނެ އެވެ. ހަތް ގްރޫޕަކަށް ބަހާލައިގެން ކޮންމެ ގްރޫޕަކުން ގަދަ ދެ ޓީމު އަނެއް ބުރަށް ހޮވޭއިރު، ނޮކައުޓް ބުރުގެ ފަހު ދެ ޖާގަ ލިބޭނީ ހަތް ގްރޫޕްގެ ތިން ވަަނަ ޓީމުގެ ތެރެއިން އެންމެ ރަނގަޅު ނަތީޖާ ނެރޭ ދެ ޓީމަކަށެވެ.

ކްލަބް މޯލްޑިވްސްގެ މުބާރާތްތަކުގެ ތެރެއިން މި ފަހަރު އެންމެ ގިނަ ޓީމު ވާދަކުރަނީ، ކްލަސިކްގަ އެވެ. އެ ގޮތުން މިދިޔަ އަހަރު ފެށި ކްލަސިކް މުބާރާތުގައި މި ފަހަރު 32 ޓީމެއް ވާދަކުރާނެ އެވެ.

އެއިޓީން ތާޓީ ފުޓްސަލް ފިއެސްޓާގައި ހަތް ޓީމު ބައިވެރިވެފައިވާއިރު، އެ ހަތް ޓީމު ވަނީ ދެ ގްރޫޕަކަށް ބަހާލައިފަ އެވެ. އެ ގޮތުން، ތިން ޓީމު ހިމެނޭ ގްރޫޕްގައި ކޮންމެ ޓީމެއް ކޮންމެ ޓީމަކާ ދެ ފަހަރު ކުޅޭނެ އެވެ.