ދިވެހި ދަރިންނަށް ދިވެއްސަކަށް ވީތީ ފަޚުރުވެރިވާން ދަސްކުރަންޖެހޭ ކަމަށް ރައީސުލްޖުމްހީރުއްޔާގެ ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ އަތޮޅު ފެންވަރުގައި ގަަައުމީ ދުވަސް ފާހަގަކުރުމނަށް ށ، މާއުނގުދޫފައި މިހާރު ކުރިއަށް ގެންދާ ޖަލްސާގައި ވާހަކަ ދައްކަވަމުންނެވެ.

ނައިބް ރައީސް ވިދާޅުވީ، ދިވެހިން ފާހަގަކުރާ ގައުމީ ދުވަހަކީ އެތައް ކާމިޔާބީތަކެއްގެ ހަނދާނެ ދިވެހިން އާކުރަންޖެހޭ ދުވަހެއް ކަމަށާއި، ދިވެހި ދަރިންނަށް ދިވެހިބަހުން ރީތިކޮށް ވާހަކަދައްކައި ލިޔެކިޔުމަކީ ކިހާ އުފާވެރި ފަޚުރުވެރިކަމެއްކަން ވިސްނައިދިނުމަށް އެމަނިކުފާނު ވަނީ ވިދާޅުވެފައެވެ.

ނައިބް ރައީސް ވިދާޅުވީ، ރައީސް ޑރ، މުއިއްޒު ވެރިކަމާއި ހަވާލުވެވަޑައިގެން އެންމެ އިސްކަމެއް ދެއްވައިގެން ކުރެއްވި ކަމަކީ ސީދާ ދިވެހިންނަށް ރާއްޖޭގެ ކަނޑުގެ ސަރަހައްދު ބެލެހެއްޓޭގޮތަށް ހެދުމާއި، ރާއްޖޭގެ އެއްގަމާއި ކަނޑުގެ ޗާޓު ކުރަހާނީވެސް ދިވެހިން ކަމަށް އެމަނިކުފާނު ވަނީ ކަނޑައަޅުއްވާފައި ކަމަށް ނައިބް ރައީސް ވިދާޅުވިއެވެ.

ދިވެހިންގެ މިނިވަންކަން ކަށަވަރުކުރުމަށް ރައީސް ފައްޓަވާފައިވާ ކަންތައްތަކަށް އިޝާރާތް ކުރައްވާ ނައިބް ރައީސް ވިދާޅުވީ، މި ސަރުކާރުން ޚާއްޞަކޮށް ރައީސް ގެންގުޅުއްވާ "ޕްރޯ މޯލްޑިވްސް" ސިޔާސަތު ދެމެހެއްޓެވުމަށް އެމަނިކުފާނު ބުރަ މަސައްކަތްތަކެއް ކުރައްވާ ކަމަށާއި، އެ ސިޔާސަތުގެ އަމާޒަކީ، ޑްރަގްގެ ވަބާއިން ޤައުމު ސަލާމަތްކުރެއްވުންކަމަށާއި، ގޭންގް ކުށްތަކަށް އަރައިގަންނަ ފަރާތްތަކަށް އެފުރުސަތު ނުދިނުން ކަމަށް ވިދާޅުވިއެވެ.

މީގެ އިތުރުން ރައީސްގެ ހިތްޕުޅުގައި މިގައުމާއި ރައްޔިތުންނާމެދު އޮތް ލޯތްބާއި މެދު އެމަނިކުފާނު ހެކިވާ ކަމަށާއި، ރާއްޖޭގެ ރީތިކަން ވިއްކައިގެން ކޮންމެ އަހަރަކު އެޖެންޓުންނާއި ބޭންކުތަކުން ފައިދާގެ ގޮތުގައިޮ ހޯދަމުން އައި އެތައް މިލިއަން ޑޮލަރެއްގެ ޓެކްސް ރާއްޖެއަށް ދެއްކުން ހައްގުވާނެ ކަމަށް ވިދާޅުވެ އެމަނިކުފާނު ފައްޓަވާފައިވަނީ ވަރަށް ހިތްވަރުގަދަ މަސައްކަތްޕުޅުތަކެއް ކަމަށް ނައިބް ރައީސް ވަނީ ފާހަގަކުރައްވާފައެވެ.

" މިދިޔަ 40 ހަކަށް އަހަރުވެސް އެއްވެސް ސަރުކާރަކުން ކުރަން ނުކެރުނު ކަމެއް އެމަނިކުފާނު އެވަނީ ފައްޓަވާދެއްވާފަ. އެމަނިކުފާނުގެ ގައުމީ އެޖެންޑާގެ އެންމެ ބޮޑު އެއް އަމާޒަކީ ޑްރަގް ވަބާއިން ގައުމު ސަލާމަތްކުރުން. ގާނޫނު މުގުރުމަށް އެއްވެސް ފުރުސަތެއް ނުދިނުން. ދިވެހިރާއްޖޭގައި އަމާންކަމާއި މަސަލަސްކަން ޔަގީންކޮށްދެއްވުން. އަދި ރާއްޖެއަށް އާމްދަނީ ލިބޭނެ ގިނަ ވަސީލަތްތަކެއް ތައާރަފްކުރެއްވުން. އަމިއްލަ ފައިމައްޗަށް ތެދުވެ ތިބި ރައްޔިތުންތަކެއް ދިރިއުޅޭ ގައުމަކަށް ހައްދަވައި މިގައުމު ބިނާކުރެއްވުން." ނައިބް ރައީސް ވިދާޅުވިއެވެ.

މީގެ އިތުރުން އެމަނިކުފާނު އަބަދުވެސް ހިފަހައްޓާނީ ދިވެހިންނަށް އެންމެ އިސްކަން ދެއްވާ ޕްރޯ މޯލްޑިވްސް ސިޔާސަތުކަން ނައިބް ރައީސް ފާހަގަކުރެއްވިއެވެ.