މި ސަރުކާރުގެ އެންމެ ބޮޑު އަމާޒަކީ "ދިވެހިރާއްޖޭގެ ފުރަތަމަ ސިޔާސަތު" ކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ދިވެހިރާއްޖޭގެ ޤައުމީ ދުވަހުގެ މުނާސަބަތުގައި ދެއްވި ވީޑިއޯ ޚިޠާބެއްގައެވެ. ރައީސުލްޖުމްހޫރިއްޔާގެ ނައިބު ފޮނުއްވި ވީޑިއޯ މެސެޖުގައި، ރާއްޖޭގެ މިނިވަންކަމާއި ސިޔާދަތު ދެމެހެއްޓުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް އަލިއަޅުއްވާލެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ޤައުމީ މިނިވަންކަން ދިފާޢުކުރެއްވުމަށް ރައީސުލްޖުމްހޫރިއްޔާ އަޅުއްވަމުން ގެންދަވާ ހަރުދަނާ ފިޔަވަޅުތަކަށް ތަޢުރީފު ކުރައްވައި، މިމަޤްޞަދު ޙާޞިލުކުރެއްވުމުގައި، ހުރިހާ ރައްޔިތުންވެސް ސާބިތުކަމާއި އެކު މަސައްކަތްކުރެއްވުމަށް ނައިބް ރައީސް އިލްތިމާސްކުރެއްވިއެވެ.

ރައީސުލްޖުމްހޫރިއްޔާގެ ނައިބުގެ ވީޑިއޯ ތަހުނިޔާގައި، ޤައުމީ އެއްބައިވަންތަކަމާއި، ޤައުމުގެ މިނިވަންކަން ދެމެހެއްޓުމަށް ކުރާ މަސައްކަތުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އަދި ބޮޑު ތަކުރުފާނު ފަދަ ތާރީޚީ ލީޑަރުންގެ ހިތްވަރު ލިބި، ގައުމުގެ މަސްލަހަތު ހިމާޔަތްކުރާނެ ބަޔަކު އުފެއްދުމަށް އިލްތިމާސް ކުރެއްވި އެވެ.

ރައީސުލްޖުމްހޫރިއްޔާގެ ނައިބު ގެ ވީޑިއޯ މެސެޖު ނިންމަވާލައްވަމުން، ރާއްޖޭގެ ހުރިހާ ރައްޔިތުންނަށް ޤައުމީ ދުވަހުގެ ތަހުނިޔާ ވިދާޅުވެ، ޤައުމުދެކެ ލޯބިވުމަށް އިލްތިމާސްކުރެއްވިއެވެ. އަދި ޤައުމަށް ޚިދުމަތް ކުރުމުގައި ޤައުމީ މަސްއޫލިއްޔަތު ވަރަށް ފަރުވާތެރިކަމާއެކު އަދާކުރުމަށް ބާރުއެޅުއްވިއެވެ.

މިދިޔަ އަންގާރަ ދުވަހު ނައިބު ރައީސް ވަނީ ގައުމީ ދުވަހުގެ ތަހުނިޔާ ވިދާޅުވެ ސޯޝަލް މީޑިއާ ސައިޓް "އެކްސް" ގައި ވެސް ޕޯސްޓު ކުރައްވާފަ އެވެ.