ބޭރު ފައިސާ މާރުކުރުމުގެ ލައިސަންސް ނެތި ހިންގާ ވިޔަފާރިތަކުން، ފާއިތުވި ނުވަ މަސްދުވަހުގެ ތެރޭގައި ކަޅު ބާޒާރުގައި 77 މިލިއަން ޑޮލަރު ވިއްކާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ވިދާޅުވީ، ލައިސަންސް ނެތި އެކަން ކުރާ 7 ފަރާތެއް ބެލިއިރު އެ ބޮޑު އަދަދު ވިއްކާފައިވާކަން އެނގިފައިވާ ކަމަށެވެ. އަދި މިހާރު ރާއްޖޭގައި ރަޖިސްޓަރީކޮށްގެން ބޭރު ފައިސާ މާރުކުރުމުގެ ހިދުމަތް ދެމުންދަނީ 63 ތަނަކުން ކަމަށް އޭނާ ފާހަގަކުރެއްވި އެވެ.

Ad by Hajj Corporation

މިފަދަ ތަންތަނަށް ކަޅުބާޒާރުން ޑޮލަރު ލިބެނީ ރާއްޖޭގައި ޑޮލަރުން އާމްދަނީ ހޯދާ ފަރާތްތަކުން ކަމަށާއި، އޭގެ ތެރޭގައި މަޝްހޫރު ރިސޯޓު ޗެއިންތައް ވެސް ހިމެނޭ ކަމަށް މިނިސްޓަރު ވިދާޅުވި އެވެ. އެގޮތުން އެފަދަ އެއް ރިސޯޓު ޗެއިނަކުން އެކަނިވެސް ނުވަ މަސް ދުވަހުގެ ތެރޭގައި 4 މިލިއަން ޑޮލަރު ކަޅުބާޒާރަށް މާރުކޮށްފައިވާ ކަމަށް އޭނާ ވިދާޅުވި އެވެ.

މިފަދަ ފަރާތްތަކުން ޑޮލަރު މާރުކުރަނީ މަރުކަޒީ ބޭންކު (އެމްއެމްއޭ) ގެ އުސޫލުތަކާ ވެސް ޚިލާފަށް ކަމަށް ވާއިރު، މިއީ ރާއްޖޭގެ ޤާނޫނުތަކުގެ ދަށުން މަނީ ލޯންޑަރިންގެ ކުށެއްގެ ގޮތުގައި ބެލެވޭނެ ކަމެއް ކަމަށް މިނިސްޓަރު ވިދާޅުވި އެވެ.

އެހެންކަމުން، ހުއްދަ ނުނަގާ ބޭރު ފައިސާ މާރުކުރުމާއި އެފަދަ ކަންކަމުގައި އެއްވެސް ގޮތަކުން ބައިވެރިވުމަކީ ޤާނޫނީ ގޮތުން ނުރައްކާތެރި ކުށަކަށްވާތީ، އެފަދަ ޢަމަލުތަކުން ދުރުހެލިވުމަށް ހޯމް މިނިސްޓަރު ވަނީ ބާރުއަޅުއްވާފަ އެވެ.