ކުރީގެ ރައީސް އިބްރާހިމް މުހައްމަދު ސޯލިހު ގައުމަށް ގައްދާރުވެ، ހިންގާފައިވާ ހުރިހާ ކަމެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޮލުގައި އެޅުވުމަށް މަސައްކަތް ކުރެއްވި ކަމަށް ވެރިކަންކުރާ ޕީޕަލްސް ނެޝަނަލް ކޮންގްރެސް، ޕީއެންސީގެ ނައިބު ރައީސް މުހައްމަދު ނިމާލް ރޭ ވިދާޅުވެއްޖެ އެވެ.

ކޮންގްރެސް ފޯރި ޕްރޮގްރާމްގައި ވާހަކަ ދައްކަވަމުން ނިމާލު ވިދާޅުވީ ރައީސް މުއިއްޒު އިންތިހާބުވެ، ހުވާ ނުކުރައްވަނީސް އެމަނިކުފާނުގެ ނަފުސު ކަތިލެއްވުމުގެ މަސައްކަތް ފަށާފައިވާ ކަމަށެވެ. އަދި ކުރީގެ ރައީސް އިބްރާހިމް މުހައްމަދު ސޯލިހު މިގައުމު އަނދަވަޅަކަށް ވައްޓާލާފައިވާ ކަމަށާއި ރައީސް މުއިއްޒު މަސައްކަތް ކުރައްވަނީ އެ އަނދަވަޅުން މިގައުމު ސަލާމަތް ކުރުމަށް ކަމަށް ނިމާލް ވިދާޅުވި އެވެ.

Ad by Hajj Corporation

ރައީސް މުއިއްޒު ގޯސް ކަމެއް ނުކަރައްވާ ކަމަށާއި ކުރީގައި ވައްޓާލި އަނދަވަޅުން ސަލާމަތްނުވެގެން އުޅެނިކޮށް ހަނގުރާމައިގެ ސަބަބުން އިގްތިސޯދަށް ގެއްލުވެފައިވަނިކޮށް، ލޯނުތައް ބަރާބަރަށް ދައްކަމުންދާ ކަމަށާއި ކުރިޔަށް އޮތް ރިޔާސީ އިންތިހާބަށް ވެސް އެންމެ ރަނގަޅު ޗޮއިސްއަކީ ޑރ. މުހައްމަދު މުއިއްޒު ކަމަށް ނިމާލު ވިދާޅުވި އެވެ.